सेन्सेक्स ७७८ अंकांनी कोसळला

जागतिक बाजारातील नकारात्मक संकेत, कच्च्या तेलाच्या वाढलेल्या किमती आणि अमेरिकेच्या फेडरल रिझर्व्हच्या निर्णयापूर्वी निर्माण झालेली अनिश्चितता यामुळे भारतीय शेअर बाजारात मंगळवारी मोठी घसरण पाहायला मिळाली. दिवसभराच्या व्यवहारात गुंतवणूकदारांनी मोठ्या प्रमाणावर नफा वसुली आणि विक्री केल्याने बाजारावर दबाव वाढला. परिणामी सेन्सेक्स ७७७.९४ अंकांनी घसरून ७४,००३.८२ अंकांवर बंद झाला, तर निफ्टी २७९.५० अंकांच्या घसरणीसह २३,११८.६० अंकांवर स्थिरावला. त्यामुळे निफ्टीने गेल्या पाच महिन्यांतील नीचांकी पातळी गाठली.

बाजारातील घसरण व्यापक स्वरूपाची होती. मिडकॅप आणि स्मॉलकॅप शेअर्समध्येही मोठ्या प्रमाणावर विक्री झाली. रिअल्टी, केमिकल्स, मेटल, ऑटो, पीएसयू बँक आणि वित्तीय क्षेत्रातील शेअर्सवर विशेष दबाव दिसून आला. बाजारातील अस्थिरता दर्शविणारा इंडिया व्हीआयएक्स जवळपास ८ टक्क्यांनी वाढला. त्यामुळे गुंतवणूकदारांमध्ये अस्वस्थता वाढल्याचे चित्र होते. बीईएलच्या शेअरमध्ये ६ टक्क्यांहून अधिक घसरण झाली. इंडिगो, टायटन, बजाज फायनान्स आणि अदानी पोर्ट्ससह अनेक दिग्गज कंपन्यांच्या शेअर्समध्येही मोठी घसरण झाली.
हे ही वाचा:
ओयो रूम बुकिंगवर पोलिसांची करडी नजर

इराणच्या दक्षिण किनाऱ्याजवळ दोन मच्छिमारी नौकांवर ड्रोन हल्ला

दरम्यान, कच्च्या तेलाच्या वाढत्या किमती हा भारतीय बाजारासाठी चिंतेचा प्रमुख विषय ठरला आहे. पश्चिम आशियातील तणावामुळे तेलाच्या पुरवठ्याबाबत चिंता वाढल्याने ब्रेंट क्रूडचा दर १०६ डॉलर प्रति बॅरलच्या वर गेला आहे. तेलाच्या वाढत्या किमतींचा परिणाम महागाई, रुपया आणि कंपन्यांच्या उत्पादन खर्चावर होण्याची शक्यता असल्याने गुंतवणूकदार सावध झाले आहेत. याशिवाय अमेरिकेतील रोखे उत्पन्नातील वाढ आणि फेडरल रिझर्व्हच्या आगामी व्याजदर निर्णयाकडेही बाजाराचे लक्ष लागले आहे.

मात्र, बाजारातील या मोठ्या घसरणीत आयटी क्षेत्राने काहीसा आधार दिला. निफ्टी आयटी निर्देशांक सुमारे २ टक्क्यांनी वधारला असून एचसीएल टेक्नॉलॉजीज, इन्फोसिस, टेक महिंद्रा आणि टीसीएसच्या शेअर्समध्ये तेजी दिसून आली. तरीही व्यापक बाजारातील विक्रीमुळे प्रमुख निर्देशांकांना सावरता आले नाही. आगामी काळात कच्च्या तेलाच्या किमती, जागतिक बाजारातील हालचाली, फेडचा व्याजदर निर्णय आणि परदेशी गुंतवणुकीचा प्रवाह हे भारतीय शेअर बाजारासाठी निर्णायक घटक ठरणार आहेत.