नेमबाजीत भारताचा रौप्यवेध!

- Advertisement -

एशियन गेम्स २०२६ मध्ये भारतीय नेमबाजांनी पदकांची लय कायम ठेवली आहे. पुरुषांच्या १० मीटर एअर रायफल सांघिक स्पर्धेत हिमांशू ढिल्लों, पार्थ माने आणि रुद्राक्ष पाटील यांच्या भारतीय संघाने शानदार कामगिरी करत रौप्यपदकावर नाव कोरले. या पदकासह एशियन गेम्समध्ये भारताच्या पदकांची संख्या तीन झाली असून, तिन्ही पदके नेमबाजीमध्ये मिळाली आहेत.

भारतीय संघाने पात्रता फेरीत एकूण १,८९०.१ गुण मिळवत दुसरे स्थान पटकावले. रुद्राक्ष पाटीलने ६० शॉट्सच्या पात्रता फेरीत ६३१.८ गुण मिळवत तिसरे स्थान मिळवले. हिमांशू ढिल्लोंने ६३० गुणांसह सातवा, तर पार्थ मानेने ६२८.३ गुणांसह प्रभावी कामगिरी केली.

चीनने १,८९९.० गुणांसह सुवर्णपदक पटकावले. दक्षिण कोरियाला १,८८४.२ गुणांसह कांस्यपदक मिळाले. रुद्राक्ष पाटीलसाठी हे एशियन गेम्समधील १० मीटर एअर रायफल सांघिक स्पर्धेतील दुसरे पदक ठरले. यापूर्वी हांगझोऊ येथे झालेल्या २०२३च्या एशियन गेम्समध्ये त्याने सुवर्णपदक जिंकले होते.

पात्रता फेरीत अव्वल आठ खेळाडूंमध्ये स्थान मिळवल्याने रुद्राक्ष आणि हिमांशू यांनी वैयक्तिक अंतिम फेरीसाठीही पात्रता मिळवली. दरम्यान, स्पर्धेच्या सुरुवातीच्या दिवशी इलावेनिल वलारिवानने दोन रौप्यपदकांची कमाई केली होती. सांघिक स्पर्धेत भारताला रौप्यपदक मिळवून देण्यासोबतच तिने महिलांच्या १० मीटर एअर रायफल वैयक्तिक स्पर्धेतही दुसरे स्थान पटकावले.

इलावेनिलचे हे पहिले वैयक्तिक एशियन गेम्स पदक ठरले. भारताने आतापर्यंत तीन रौप्यपदके जिंकली असून, सर्व पदके नेमबाजीमध्ये मिळाली आहेत.