पाकिस्तानात भीषण आत्मघाती स्फोट; ११ ठार, ३० जखमी

पाकिस्तानच्या वायव्य भागातील खैबर पख्तूनख्वा प्रांतातील डेरा इस्माईल खान जिल्ह्यात शनिवारी झालेल्या भीषण आत्मघाती स्फोटाने मोठी खळबळ उडाली आहे. रस्त्यालगत असलेल्या पोलीस तपासणी नाक्याला लक्ष्य करून करण्यात आलेल्या या हल्ल्यात किमान ११ जणांचा मृत्यू झाला असून सुमारे ३० जण जखमी झाले आहेत. मृतांमध्ये सुरक्षा दलातील जवान आणि सामान्य नागरिकांचा समावेश असल्याचे स्थानिक अधिकाऱ्यांनी सांगितले. प्राथमिक माहितीनुसार, स्फोटकांनी भरलेले वाहन तपासणी नाक्याजवळ नेण्यात आले आणि त्यानंतर स्फोट घडवून आणण्यात आला. स्फोटानंतर परिसरात मोठ्या प्रमाणावर धूर पसरला, तर घटनास्थळी ढिगारा आणि वाहनांचे अवशेष आढळून आले.
हे ही वाचा:
मुसळधार पावसाचा चारधाम यात्रेला फटका

हिंजवडी-म्हाळुंगेतील वाहतूककोंडीने आयटी कर्मचारी हैराण

स्फोटाची माहिती मिळताच बचाव पथके आणि सुरक्षा दल घटनास्थळी दाखल झाले. जखमींना तातडीने जवळच्या रुग्णालयात हलवण्यात आले असून त्यापैकी काहींची प्रकृती गंभीर असल्याचे सांगण्यात आले आहे. हल्ल्यानंतर परिसराची नाकेबंदी करण्यात आली असून सुरक्षा यंत्रणांनी तपास सुरू केला आहे. या हल्ल्याची जबाबदारी तहरीक-ए-तालिबान पाकिस्तान अर्थात टीटीपीने स्वीकारल्याचे वृत्त आहे. पाकिस्तानच्या खैबर पख्तूनख्वा भागात गेल्या काही काळापासून सुरक्षा दलांना लक्ष्य करून हल्ल्यांच्या घटना वाढल्या आहेत. डेरा इस्माईल खान हा अफगाणिस्तानच्या सीमेजवळील संवेदनशील भागांपैकी एक असून यापूर्वीही या परिसरात दहशतवादी हल्ले झाले आहेत.

दरम्यान, या हल्ल्याच्या पार्श्वभूमीवर पाकिस्तान-अफगाणिस्तान सीमावर्ती भागातील सुरक्षेचा प्रश्न पुन्हा ऐरणीवर आला आहे. पाकिस्तान आणि अफगाणिस्तान यांच्यात सीमापार दहशतवादी कारवायांवरून आधीच तणाव निर्माण झाला आहे. पाकिस्तानकडून टीटीपीच्या कारवायांसाठी अफगाणिस्तानातील ठिकाणांचा वापर होत असल्याचे आरोप केले जातात, तर अफगाण तालिबानकडून हे आरोप नाकारले जातात. अशा परिस्थितीत डेरा इस्माईल खानमधील ताज्या स्फोटामुळे खैबर पख्तूनख्वामधील सुरक्षा आव्हान अधिक गंभीर झाल्याचे चित्र आहे. मात्र, हल्ल्याचा नेमका कट, स्फोटकांची क्षमता आणि त्यामागील संपूर्ण नेटवर्क याबाबतचा तपास अद्याप सुरू आहे.