शटलर आयुष शेट्टीचा पुरुष एकेरीतील प्रवास संपला

आशियाई क्रीडा स्पर्धा २०२६ मध्ये भारतीय बॅडमिंटनपटू आयुष शेट्टीचा पुरुष एकेरीतील प्रवास तिसऱ्या फेरीत संपुष्टात आला. शनिवारी झालेल्या अत्यंत चुरशीच्या सामन्यात त्याला चीनी तैपेईच्या टिएन-चेन चाओ याच्याकडून १६-२१, २१-१९, १७-२१ असा पराभव स्वीकारावा लागला.

आयुषने यापूर्वी कझाकिस्तानच्या मखसुत ताजीबुल्लायेवचा दुसऱ्या फेरीत २१-७, २१-७ असा सरळ गेममध्ये पराभव करून तिसऱ्या फेरीत प्रवेश केला होता. चाओविरुद्धच्या सामन्यात पहिला गेम गमावल्यानंतर आयुषने जोरदार पुनरागमन करत दुसरा गेम जिंकला. मात्र निर्णायक तिसऱ्या गेममध्ये त्याला विजय मिळवता आला नाही.

हे ही वाचा:

बांगलादेशात ड्रममध्ये सापडला हिंदू व्यक्तीचा मृतदेह

भारताच्या क्रिप्टो बाजारात तरुणाईची एन्ट्री

तृणमूल आमदार कुणाल घोष यांच्या गाडीवर फेकली अंडी

अनाहत सिंहचा ऐतिहासिक पराक्रम

उन्नती हुड्डाची शानदार आगेकूच

दरम्यान, उन्नती हुड्डाने महिला एकेरीत शानदार कामगिरी करत पुढील फेरीत प्रवेश केला. मलेशियाच्या वोंग लिंग चिंग हिच्याविरुद्ध तब्बल ७९ मिनिटे रंगलेल्या चुरशीच्या सामन्यात उन्नतीने २१-१४, २०-२२, २१-१९ असा विजय मिळवला.

महिला दुहेरीत त्रिशा जॉली आणि गायत्री गोपीचंद यांच्या जोडीने जपानच्या मायु मात्सुमोतो आणि युकी फुकुशिमा यांच्या जोडीचा २४-२२, २१-१८ असा पराभव करत उपांत्यपूर्व फेरीत प्रवेश केला. दोन वेळा ऑलिम्पिक पदकविजेती पी. व्ही. सिंधू हिनेही यापूर्वीच महिला एकेरीच्या अंतिम १६ खेळाडूंच्या फेरीत प्रवेश केला आहे. सिंधूने चीनी तैपेईच्या चिउ पिन-चियान हिचा २१-१९, २१-१४ असा पराभव करत पुढील फेरी गाठली आहे.

त्यामुळे महिला एकेरीत उन्नती हुड्डा आणि पी. व्ही. सिंधू यांच्या कामगिरीकडे भारतीय चाहत्यांचे लक्ष लागले आहे.