कोरियाचा अचूक निशाणा; भारताच्या तिरंदाजांना रौप्य!

एशियन गेम्स २०२६ मध्ये भारतीय पुरुष रिकर्व तिरंदाजी संघाने दमदार कामगिरी करत रौप्यपदकावर नाव कोरले. अंतिम सामन्यात मात्र नऊ वेळच्या चॅम्पियन दक्षिण कोरियाने भारताचा ५-१ असा पराभव केला. नीरज चौहान, यशदीप भोगे आणि धीरज बोम्मादेवरा या त्रिकुटाने अखेरपर्यंत झुंज दिली.

सामन्याच्या पहिल्या सेटमध्ये दोन्ही संघांनी ५६-५६ गुण मिळवत बरोबरी साधली. भारताकडे सेट जिंकण्याची संधी होती; मात्र शेवटच्या तीन बाणांत १०, ८ आणि ९ गुण मिळाल्याने भारताला आघाडी घेता आली नाही.

दुसऱ्या सेटमध्ये कोरियाने आपला अनुभव पणाला लावत ५७-५० अशी बाजी मारली. कोरियाच्या तिरंदाजांनी १० गुणांवर चार अचूक बाण मारले. भारताकडून काही निशाणे अपेक्षेप्रमाणे न लागल्याने कोरियाने सामन्यात ३-१ अशी आघाडी मिळवली.

तिसऱ्या आणि निर्णायक सेटमध्ये भारतीय संघाने सुरुवातीच्या तीन बाणांत २८ गुण मिळवत पुनरागमनाची आशा निर्माण केली. नीरजने १०, तर यशदीप आणि धीरजने प्रत्येकी ९ गुण मिळवले. मात्र, त्यानंतर भारताकडून झालेल्या चुकांचा फायदा घेत कोरियाने शेवटच्या तीन बाणांत २८ गुण मिळवले आणि सेट ५६-५४ असा जिंकला.

अखेर दक्षिण कोरियाने सामना ५-१ असा जिंकत सुवर्णपदक पटकावले, तर भारताला रौप्यपदकावर समाधान मानावे लागले.

सलग दुसऱ्यांदा रौप्य

पुरुष रिकर्व टीम इव्हेंटमध्ये भारताचे हे सलग दुसरे एशियन गेम्स रौप्यपदक ठरले. हांगझोऊ २०२३ मध्येही भारताला दक्षिण कोरियाकडून अंतिम सामन्यात पराभव पत्करावा लागला होता. त्या संघात धीरज बोम्मादेवरा याचाही समावेश होता.