छत्रपती संभाजीनगरमधील प्रसिद्ध रॉयल बेकरीचा परवाना निलंबित

छत्रपती संभाजीनगरमध्ये कप केकमध्ये रबर आणि प्लास्टिकचे तुकडे आढळल्याच्या तक्रारीनंतर अन्न व औषध प्रशासनाने रॉयल बेकरीवर कारवाई केली आहे. चिकलठाणा एमआयडीसी परिसरातील रॉयल बेकर्स अँड कन्फेक्शनर्स या बेकरीत तयार होणाऱ्या कप केकमध्ये परकीय पदार्थ आढळल्याची तक्रार ग्राहकाने केली होती. या तक्रारीची दखल घेत प्रशासनाने बेकरीच्या उत्पादन केंद्राची तपासणी केली. त्यावेळी अन्नपदार्थांच्या निर्मिती प्रक्रियेत स्वच्छतेसह अनेक गंभीर त्रुटी आढळून आल्या. ग्राहकांच्या आरोग्याला संभाव्य धोका लक्षात घेऊन प्रशासनाने बेकरीचा अन्न परवाना निलंबित करण्याचा निर्णय घेतला.

अन्न सुरक्षा अधिकाऱ्यांनी ७ ऑक्टोबर २०२६ रोजी केलेल्या अचानक तपासणीत बेकरी परिसरात अस्वच्छता, उघड्यावर कचरा आणि कीटकांचा प्रादुर्भाव रोखण्यासाठी आवश्यक उपाययोजनांचा अभाव आढळला. खिडक्या आणि दरवाजांना कीटक प्रतिबंधक जाळ्या नव्हत्या. कर्मचाऱ्यांच्या वैद्यकीय तपासण्या व लसीकरणाच्या नोंदीही उपलब्ध नव्हत्या. तसेच कामगारांकडून हातमोजे, ॲप्रन आणि डोक्याचे संरक्षण करणाऱ्या साधनांचा वापर केला जात नसल्याचे तपासणीत समोर आले.
हे ही वाचा:
फ्लायदुबई विमानातील हल्ल्याचा तपास आता एनआयएकडे

विश्वचषकासाठी रोहित-विराटचा फॉर्म निर्णायक!

बेकरीत अन्नपदार्थांच्या पुनर्पॅकिंगसाठी वापरले जाणारे साहित्य अन्नसुरक्षेच्या निकषांनुसार नसल्याचे, तसेच वापरल्या जाणाऱ्या पाण्याच्या आणि तयार अन्नपदार्थांच्या गुणवत्तेचे प्रयोगशाळा तपासणी अहवाल उपलब्ध नसल्याचेही आढळले. या गंभीर त्रुटींच्या पार्श्वभूमीवर सहायक आयुक्त दयानंद पाटील यांनी ८ ऑक्टोबरपासून बेकरीचा अन्न परवाना निलंबित केला. सर्व त्रुटी दूर करून प्रशासनाची लेखी परवानगी मिळेपर्यंत उत्पादन आणि विक्री सुरू करता येणार नाही. या घटनेमुळे अन्नपदार्थांच्या गुणवत्तेची तपासणी, उत्पादनातील स्वच्छता आणि ग्राहकांच्या आरोग्याच्या सुरक्षेबाबत पुन्हा प्रश्न उपस्थित झाले आहेत.