जिओ प्लॅटफॉर्मचा सर्वात मोठा आयपीओ येतोय २१ ऑक्टोबरला

मुकेश अंबानी यांच्या नेतृत्वाखालील रिलायन्स इंडस्ट्रीजची डिजिटल आणि दूरसंचार क्षेत्रातील प्रमुख कंपनी जिओ प्लॅटफॉर्म्सचा बहुप्रतीक्षित आयपीओ २१ ऑक्टोबर रोजी गुंतवणूकदारांसाठी खुला होणार आहे. या आयपीओच्या माध्यमातून कंपनी ३०,२१३ कोटी रुपये उभारणार असून, तो भारतीय शेअर बाजाराच्या इतिहासातील सर्वात मोठा आयपीओ ठरण्याची शक्यता आहे. यामुळे २०२४ मध्ये २७,८५९ कोटी रुपयांचा आयपीओ आणणाऱ्या ह्युंदाई मोटर इंडियाचा विक्रम मोडला जाऊ शकतो. जिओ प्लॅटफॉर्म्सने प्रति समभाग १,०६५ ते १,११९ रुपये असा किंमतपट्टा निश्चित केला आहे. अँकर गुंतवणूकदारांसाठी १९ ऑक्टोबर रोजी आयपीओ खुला होईल, तर सर्वसामान्य गुंतवणूकदारांना २१ ते २३ ऑक्टोबरदरम्यान अर्ज करता येणार आहे. कंपनीचे समभाग २८ ऑक्टोबर रोजी शेअर बाजारात सूचिबद्ध होण्याची अपेक्षा आहे.

या आयपीओमध्ये किरकोळ गुंतवणूकदारांना एका लॉटमध्ये १२ समभागांसाठी अर्ज करता येणार असून, प्रति समभाग १,११९ रुपये या कमाल किमतीनुसार एका लॉटसाठी १३,४२८ रुपये गुंतवावे लागतील. कंपनी नवीन समभाग जारी करून निधी उभारणार असून, हा पूर्णपणे फ्रेश इश्यू असेल. उभारलेल्या निधीतील सुमारे २७,५०० कोटी रुपये रिलायन्स जिओ इन्फोकॉमचे कर्ज फेडण्यासाठी वापरण्याची योजना आहे. उर्वरित निधी सामान्य कॉर्पोरेट उद्दिष्टांसाठी वापरला जाणार आहे. त्यामुळे या आयपीओकडे किरकोळ गुंतवणूकदारांसह संस्थात्मक गुंतवणूकदारांचेही लक्ष लागले आहे.
हे ही वाचा:
अमली पदार्थ तस्करीतून कमावलेली १३.४३ कोटींची मालमत्ता जप्त

सेन्सेक्सची १,५०० अंकांची जोरदार उसळी

‘कैसा हराया’ चे वडील शिंदे सेनेत

महाराष्ट्रातील एसआयआर प्रक्रियेवर सर्वोच्च न्यायालयाची निवडणूक आयोगाला नोटीस
जिओ प्लॅटफॉर्म्सची आर्थिक कामगिरी या आयपीओच्या दृष्टीने महत्त्वाची ठरत आहे. आर्थिक वर्ष २०२५-२६ मध्ये कंपनीचा महसूल १४.६ टक्क्यांनी वाढून १.४७ लाख कोटी रुपयांवर पोहोचला. याच काळात कंपनीचा निव्वळ नफा १५.१ टक्क्यांनी वाढून ३०,०४९ कोटी रुपये झाला. दूरसंचार सेवा, डिजिटल प्लॅटफॉर्म आणि तंत्रज्ञान क्षेत्रातील विस्तारामुळे कंपनीने भारतीय बाजारपेठेत मजबूत स्थान निर्माण केले आहे.

कंपनीचा ग्राहकवर्ग ५३ कोटींच्या पुढे गेल्याने जिओची बाजारातील व्याप्ती स्पष्ट होते. दूरसंचार सेवांसोबतच कृत्रिम बुद्धिमत्ता, क्लाउड सेवा आणि डिजिटल तंत्रज्ञानातील वाढत्या संधी कंपनीसाठी महत्त्वाच्या ठरू शकतात. मात्र, आयपीओमध्ये गुंतवणूक करण्यापूर्वी कंपनीचे मूल्यांकन, बाजारातील परिस्थिती आणि भविष्यातील वाढीच्या शक्यतांचा अभ्यास करणे आवश्यक आहे. जिओचा हा आयपीओ भारतीय भांडवली बाजारातील मोठी घडामोड ठरणार असून, त्याला गुंतवणूकदारांकडून कसा प्रतिसाद मिळतो, याकडे आता सर्वांचे लक्ष लागले आहे.