व्हॉट्सअप ग्रुप, इन्स्टाग्रामवरून पाकिस्तान कनेक्शन; कर्नाटकात संशयिताला अटक

कर्नाटकातील कलबुर्गी येथे तपास यंत्रणांनी पश्चिम बंगालमधील ममताज मल्लिक या तरुणाला संशयित दहशतवादी म्हणून अटक केली आहे. त्याचे पाकिस्तानमधील व्यक्ती आणि शेजारील देशातून कार्यरत असलेल्या दहशतवादी संघटनांशी कथित संबंध असल्याचा संशय असून, कर्नाटक पोलिसांकडून या प्रकरणाचा सखोल तपास सुरू आहे.

याप्रकरणी ब्रह्मपूर पोलीस ठाण्यात गुन्हा दाखल करण्यात आला असून, दहशतवादी संघटनांशी तसेच भारतविरोधी कारवायांमध्ये सहभागी असल्याचा संशय असलेल्या व्यक्तींशी त्याचे संबंध आहेत का, याचा तपास केला जात आहे. दहशतवादी कृत्यांसाठी कट रचणे, प्रयत्न करणे, चिथावणी देणे किंवा जाणीवपूर्वक मदत करणे यांसारख्या आरोपांशी संबंधित कायदेशीर तरतुदीही प्रकरणात समाविष्ट करण्यात आल्या आहेत.

तपासादरम्यान मल्लिक हा व्हॉट्सअप ग्रुप आणि इन्स्टाग्रामच्या माध्यमातून संशयित व्यक्ती व गटांच्या संपर्कात असल्याची माहिती पोलिसांना मिळाल्याचे सांगण्यात येत आहे. तो ‘इमाम महदी’ नावाच्या व्हॉट्सॲप ग्रुपचा सदस्य होता. चौकशीदरम्यान पाकिस्तानमधील असल्याचे सांगितल्या जाणाऱ्या जैनुल आबदीन नामक व्यक्तीने त्याला या ग्रुपमध्ये सहभागी करून घेतल्याची माहिती मल्लिकने दिल्याचा पोलिसांचा दावा आहे.

जैनुल आबदीन हा पाकिस्तानस्थित लष्कर-ए-तोयबा या दहशतवादी संघटनेचा कमांडर म्हणून कार्यरत असल्याची माहिती तपास यंत्रणांना मिळाल्याचे सूत्रांनी नमूद केले आहे. या कथित संबंधांची सत्यता आणि त्यांचे स्वरूप स्पष्ट करण्यासाठी पोलीस अधिक तपास करत आहेत. मल्लिक हा ‘कश्मीर टायगर 313’, ‘आय लव्ह पाकिस्तान, आय लव्ह कश्मीर’ आणि ‘मेजर इक्बाल आयएसआय’ या नावांच्या इन्स्टाग्राम पेजचेही अनुसरण करत होता, अशी माहिती पोलिसांनी दिली आहे. तसेच पाकिस्तानशी संबंधित व्हिडिओ आणि रील्स पाहणे व त्यांना पसंती देणे, अशा ऑनलाइन हालचालीही तपासाच्या कक्षेत आहेत.

हे ही वाचा:

‘त्या’ पद्धतीने रिजिम चेंजवर आमचा विश्वास नाही!

भारत-अमेरिका व्यापार करार अंतिम टप्प्यात

टायगर गोळीबारप्रकरणी तिघांना रेल्वेत पकडले

‘लष्कर’ संस्थापक सदस्य मोहम्मद सरवर पायऱ्यांवरून पडून गतप्राण

तपास यंत्रणांनी मल्लिकच्या मोबाइल फोनमधील फोटो, व्हिडिओ आणि अन्य डिजिटल पुराव्यांची तपासणी सुरू केली आहे. त्याच्या ऑनलाइन संपर्कांचे स्वरूप, संशयित नेटवर्कशी असलेले संबंध आणि कथित कारवायांमधील त्याचा सहभाग यांचा शोध घेतला जात आहे.