विराटच्या १३ टॅटूंमागे दडलंय तरी काय?

क्रिकेटच्या मैदानावर विक्रमांचे डोंगर उभे करणारा टीम इंडियाचा स्टार फलंदाज विराट कोहली केवळ आपल्या फलंदाजीमुळेच नव्हे, तर अनोख्या स्टाइलमुळेही चाहत्यांमध्ये लोकप्रिय आहे. विराटला टॅटूची विशेष आवड असून, त्याच्या शरीरावर तब्बल १३ टॅटू आहेत. विशेष म्हणजे, यातील प्रत्येक टॅटूमागे एक वेगळा अर्थ आणि आठवण दडलेली आहे. ५ नोव्हेंबर रोजी विराटच्या वाढदिवसानिमित्त त्याच्या या टॅटूंची रंजक कहाणी चर्चेत आली आहे.

विराटच्या शरीरावरील टॅटू हे केवळ फॅशनचे प्रतीक नाहीत, तर त्याची आध्यात्मिक श्रद्धा, कौटुंबिक जिव्हाळा, क्रिकेटमधील प्रवास आणि जीवनाकडे पाहण्याचा दृष्टिकोनही त्यातून व्यक्त होतो. डाव्या हाताच्या ट्रायसेपवर त्याने ‘ओम’चे चिन्ह गोंदवले आहे. हे चिन्ह आध्यात्मिकता आणि वैश्विक ऊर्जेचे प्रतीक मानले जाते. डाव्या खांद्यावर मठाचे चित्र असून, ते साधना आणि आध्यात्मिक जीवनाशी संबंधित आहे.

वृश्चिक राशीचा असलेल्या विराटने उजव्या हाताच्या वरच्या भागावर विंचवाचे चित्र गोंदवले आहे. जिद्द, उत्कटता आणि समर्पण हे या राशीशी संबंधित गुण त्याच्या व्यक्तिमत्त्वातही दिसतात. डाव्या हातावर असलेले २६९ आणि १७५ हे आकडे त्याच्या क्रिकेट कारकिर्दीतील महत्त्वाचे टप्पे दर्शवतात. २६९ हा त्याचा कसोटी कॅप क्रमांक, तर १७५ हा वनडे कॅप क्रमांक आहे. याशिवाय आई सरोज आणि वडील प्रेम कोहली यांच्या नावांचे टॅटूही त्याने गोंदवले आहेत.

विराटच्या डाव्या हातावर जपानी समुराईचे चित्र आहे. शिस्त, सन्मान, सामर्थ्य आणि आत्मसंयम यांचे प्रतीक म्हणून या टॅटूकडे पाहिले जाते. त्याच्या वरच्या बाजूला ‘गॉड्स आय’ अर्थात दैवी डोळ्याचे चित्र आहे. आपल्या प्रत्येक कृतीवर दैवी शक्तीची नजर असल्याची भावना यातून व्यक्त होते. डाव्या खांद्यावरील पियोनी या फुलाचे चित्र समृद्धी, प्रतिष्ठा आणि सन्मानाचे प्रतीक आहे. उजव्या हाताच्या पुढील भागावर मेटाट्रॉन क्यूब हे आध्यात्मिक भूमितीशी संबंधित चिन्ह आहे.

भगवान शंकरावरील श्रद्धाही विराटच्या टॅटूमधून दिसून येते. डाव्या हातावर कैलास पर्वतावर ध्यानस्थ बसलेल्या भगवान शिवाचे चित्र असून, त्याच्या पार्श्वभूमीला मानसरोवराचे दर्शन घडते. आयपीएल २०२६ पूर्वी त्याने डाव्या हातावर कमळाचे मोठे टॅटू गोंदवले. हे त्याच्या जीवनप्रवासाचे प्रतीक आहे. त्याच्या नव्या टॅटूमध्ये पाण्यात थेंब पडल्यावर निर्माण होणाऱ्या लहरींसारखी रचना आहे. एखादी छोटी कृतीही मोठा परिणाम घडवू शकते, हा संदेश त्यातून दिला जातो.