सोने-चांदीच्या दरांना मोठा धक्का

८ जानेवारी २०२६ रोजी देशातील सराफा बाजारात सोने आणि चांदीच्या दरांमध्ये अचानक मोठी घसरण पाहायला मिळाली. चांदीच्या दरात तब्बल १२,२२५ रुपयांची घट झाली असून, सोन्याच्या दरातही १,२३२ रुपयांची घसरण नोंदवली गेली आहे. आजचा २४ कॅरेट सोन्याचा दर १,३९,५०६ रुपये प्रति १० ग्रॅम, तर चांदीचा दर २,४२,८४८ रुपये प्रति किलो इतका आहे.

मागील काही दिवसांत उच्चांक गाठलेल्या मौल्यवान धातूंच्या किमती आज लक्षणीयरीत्या खाली आल्याने गुंतवणूकदार आणि ग्राहकांचे लक्ष या घडामोडीकडे वेधले गेले आहे. विशेषतः चांदीच्या दरात एका दिवसात मोठी घसरण नोंदवली गेली असून, काही बाजारांमध्ये चांदी तब्बल दहा हजार रुपयांहून अधिक स्वस्त झाल्याचे चित्र आहे.

मागील दिवशी ऐतिहासिक उच्चांकी पातळीवर पोहोचलेली चांदी आज मोठ्या प्रमाणात खाली आली. त्यामुळे औद्योगिक वापर तसेच गुंतवणुकीसाठी चांदी खरेदी करणाऱ्यांना काहीसा दिलासा मिळाल्याचे चित्र आहे. सोन्याच्या दरातही घट झाली असून, २४ कॅरेट सोन्याच्या दरात प्रति १० ग्रॅम लक्षणीय घसरण नोंदवली गेली आहे. परिणामी, मागील काही आठवड्यांत महाग झालेलं सोनं आज तुलनेने स्वस्त झाले आहे.
हे ही वाचा :
कोलकात्यात राजकीय सल्लागार संस्थेवर ईडीची कारवाई

बांगलादेश सीमेवरून बनावट नोटा रॅकेटची मुख्य सूत्रधार गजाआड

बाजारतज्ज्ञांच्या मते, जागतिक बाजारातील घडामोडी, डॉलरची मजबुती आणि आंतरराष्ट्रीय स्तरावरील नफावसुली यांचा थेट परिणाम भारतीय सराफा बाजारावर झाला आहे. याशिवाय आंतरराष्ट्रीय पातळीवरील अनिश्चिततेमुळे मौल्यवान धातूंमधील तेजी काहीशी थंडावली आहे. हे दर इंडिया बुलियन अँड ज्वेलर्स असोसिएशन (आयबीजेए) कडून जाहीर करण्यात आलेल्या सरासरी दरांनुसार असल्याचे सांगण्यात येते.

एकूणच, आजची घसरण ही ग्राहकांसाठी खरेदीची संधी ठरू शकते, तर गुंतवणूकदारांसाठी पुढील काही दिवस बाजाराचा कल लक्षात घेऊन निर्णय घेणे महत्त्वाचे ठरणार आहे.