सराफा बाजारातील तेजी कायम

मुंबई सराफा बाजारात आजही सोन्या-चांदीच्या दरात मोठी वाढ नोंदवण्यात आली. जागतिक बाजारातील अस्थिरता, अमेरिकन डॉलरची कमकुवत स्थिती आणि सुरक्षित गुंतवणुकीकडे वाढलेला कल यामुळे मौल्यवान धातूंना देशांतर्गत बाजारात जोरदार मागणी मिळत आहे. 28 जानेवारी 2026 रोजी सोने प्रति 10 ग्रॅम जवळपास ₹1,59,710 या विक्रमी पातळीवर पोहोचले असून, मागील दिवसाच्या तुलनेत सुमारे ₹5,400 ची वाढ झाली आहे. दिवसेंदिवस वाढत असलेले दर पाहता, सुरक्षित गुंतवणुकीसाठी सोनं हेच सर्वाधिक पसंतीचं साधन ठरत असल्याचे स्पष्ट संकेत मिळत आहेत.

दरम्यान, 22 कॅरेट सोन्याचाही दर आज मुंबईत प्रति 10 ग्रॅम ₹1,46,400 इतका नोंदवण्यात आला आहे. यात मागील दिवसाच्या तुलनेत सुमारे ₹4,950 ची वाढ झाली आहे. या दरवाढीमुळे ग्राहकांमध्ये संमिश्र प्रतिक्रिया दिसून येत आहेत. काही गुंतवणूकदारांनी खरेदी सुरू ठेवली असली, तरी उच्च दरांमुळे अनेक ग्राहकांनी दागिन्यांची खरेदी तात्पुरती पुढे ढकलल्याचे चित्र आहे. सध्या सोने केवळ दागिन्यापुरते मर्यादित न राहता, गुंतवणुकीच्या दृष्टीनेही लोकांच्या पसंतीस उतरले आहे.
हे ही वाचा:
पार्ले बिस्किटांचा सुगंधी अध्याय बंद

राज्याच्या राजकारणातील ‘दादा’ व्यक्तिमत्त्व हरपले! कशी होती राजकीय कारकीर्द?

चांदीच्या बाजारातही आज लक्षणीय उछाल पाहायला मिळाला. मुंबई सराफा बाजारात चांदीचा दर सुमारे ₹3,55,800 प्रति किलो इतका व्यवहार करत आहे. मागील दिवसांच्या तुलनेत झालेली ही वाढ औद्योगिक मागणी आणि गुंतवणूकदारांचा वाढता रस दर्शवते. अलीकडील काळात चांदीच्या दरात सातत्याने चढ-उतार दिसून येत असून, त्यामुळे सराफा बाजारात उत्साहाचे वातावरण निर्माण झाले आहे.

सोने आणि चांदीच्या दरातील ही वाढ प्रामुख्याने जागतिक आर्थिक घटकांमुळे होत असल्याचे तज्ज्ञांचे मत आहे. फेडरल रिझर्व्हच्या धोरणांबाबतची अनिश्चितता, वाढती महागाई आणि जागतिक शेअर बाजारातील अस्थिरता यामुळे सोन्याचे दर आंतरराष्ट्रीय पातळीवर मजबूत झाले आहेत. याचा थेट परिणाम भारतीय बाजारावरही होत असून, सुरक्षित गुंतवणुकीच्या शोधात गुंतवणूकदार मोठ्या प्रमाणावर सोनं-चांदीकडे वळताना दिसत आहेत.

सराफा बाजारातील तज्ज्ञांच्या मते, “आज सोने आणि चांदी केवळ दागिन्यांसाठी नव्हे, तर आर्थिक पोर्टफोलिओचा एक महत्त्वाचा घटक बनले आहेत.” विश्लेषकांचे म्हणणे आहे की, येत्या काही आठवड्यांत जागतिक आर्थिक घडामोडी आणि व्याजदर धोरणांचा सराफा बाजारावर मोठा प्रभाव राहण्याची शक्यता आहे. त्यामुळे गुंतवणूकदारांनी सध्याच्या वाढत्या दरांचा विचार करून सावधपणे निर्णय घ्यावा, असा सल्लाही त्यांनी दिला आहे.त पुन्हा तेजी