डाटा लीक प्रकरणात कूपॅंगचा मोठा निर्णय

दक्षिण कोरियातील आघाडीची ई-कॉमर्स कंपनी कूपॅंग ने मोठ्या प्रमाणावर झालेल्या डेटा लीक प्रकरणानंतर १.६८ ट्रिलियन वॉन (सुमारे १.१७ अब्ज डॉलर) इतक्या भरपाई योजनेची घोषणा केली आहे. कंपनीने ही माहिती सोमवारी दिली. हा निर्णय कूपॅंगचे संस्थापक किम बोम-सुक यांनी सार्वजनिकरित्या माफी मागितल्यानंतर अवघ्या एका दिवसात घेण्यात आला. या डेटा लीकमुळे दक्षिण कोरियातील सुमारे दोन-तृतीयांश लोकसंख्या प्रभावित झाली होती.

कंपनीच्या माहितीनुसार, कूपॅंग आपल्या ३.३७ कोटी ग्राहकांपैकी प्रत्येकाला ५०,००० वॉन (सुमारे ३,००० रुपये) मूल्याचे कूपन व सवलती देणार आहे. यामध्ये कूपॅंग वॉउ (Coupang Wow) चे पेड सदस्य, सामान्य वापरकर्ते तसेच खाते बंद केलेले जुने ग्राहक यांचाही समावेश असेल. ही भरपाई १५ जानेवारीपासून दिली जाणार आहे. कूपॅंगचे अंतरिम सीईओ हॅरॉल्ड रॉजर्स म्हणाले की, ही घटना कंपनीसाठी धडा असून भविष्यात ग्राहकांना सर्वोच्च प्राधान्य देत त्यांचा विश्वास पुन्हा मिळवण्यासाठी कंपनी पूर्ण जबाबदारीने काम करेल.

हेही वाचा..

दिल्लीत मंत्री आशीष सूद यांनी स्वच्छता व्यवस्थेची केली पाहणी

म्हणून काँग्रेस पक्षाचे तुकडे-तुकडे झाले

दिग्विजय सिंह यांच्या पोस्टनंतर रेवंत रेड्डींचे प्रत्युत्तर

१८ फरार आरोपींवर इनाम जाहीर

प्रत्येक ग्राहकाला मिळणाऱ्या ५०,००० वॉनच्या भरपाईमध्ये विविध सेवांसाठीचे कूपन असतील त्यात कूपॅंग शॉपिंगसाठी ५,००० वॉन, फूड डिलिव्हरी सेवा Coupang Eats साठी ५,००० वॉन, प्रवास सेवांसाठी २०,००० वॉन आणि आर.लक्स या लक्झरी ब्युटी व फॅशन सेवांसाठी २०,००० वॉन यांचा समावेश आहे. गेल्या आठवड्यात कंपनीने सांगितले होते की तपासात एका माजी कर्मचाऱ्याला डेटा लीकसाठी जबाबदार ठरवण्यात आले आहे. हॅकिंगसाठी वापरलेली उपकरणे जप्त करण्यात आली असून आरोपीने गुन्हा कबूल केला आहे. कंपनीचा दावा आहे की आरोपीने सुमारे ३,००० खात्यांचा डेटा साठवून ठेवला होता, जो नंतर हटवण्यात आला.

मात्र सरकारने हा दावा एकतर्फी असल्याचे सांगितले असून, या प्रकरणातील सरकारी व खासगी तपासाचा अंतिम अहवाल अद्याप जाहीर झालेला नाही. २९ नोव्हेंबर रोजी कूपॅंगने ३.३७ कोटी ग्राहकांची वैयक्तिक माहिती लीक झाल्याची अधिकृत पुष्टी केली होती. ही संख्या २० नोव्हेंबर रोजी अधिकाऱ्यांना कळवलेल्या सुरुवातीच्या ४,५०० खात्यांच्या आकड्यांपेक्षा खूपच जास्त आहे. कंपनीनुसार, सप्टेंबर तिमाहीत कूपॅंगचे सक्रिय वापरकर्ते २.४७ कोटी होते, त्यामुळे जवळपास सर्वच वापरकर्ते या डेटा लीकने प्रभावित झाले असावेत, असा अंदाज आहे. लीक झालेल्या माहितीत ग्राहकांची नावे, फोन नंबर, ई-मेल आयडी आणि वितरण पत्ते यांचा समावेश होता.