इंडिगोवर ठोठावला २२ कोटींचा दंड

डिसेंबर २०२५ मध्ये देशभरात मोठ्या प्रमाणावर विमानसेवेचा गोंधळ झाला होता. या प्रकरणाची गंभीर दखल घेत नागरी विमान वाहतूक महासंचालनालय (Directorate General of Civil Aviation) यांनी देशातील आघाडीची खासगी विमानसेवा कंपनी IndiGo वर २२ कोटी २० लाख रुपयांचा दंड ठोठावला आहे. प्रवाशांच्या सुरक्षितता आणि सोयीसुविधांमध्ये गंभीर त्रुटी आढळल्याने ही कठोर कारवाई करण्यात आली आहे.

महासंचालनालयाच्या चौकशीनुसार, ३ ते ५ डिसेंबर २०२५ या कालावधीत इंडिगोच्या मोठ्या प्रमाणावर उड्डाणांमध्ये अडथळे निर्माण झाले. या काळात २,५०० हून अधिक उड्डाणे रद्द करण्यात आली, तर १,८०० पेक्षा जास्त उड्डाणांना विलंब झाला. याचा थेट फटका ३ लाखांहून अधिक प्रवाशांना बसला. अनेक विमानतळांवर प्रवाशांना तासन्‌तास थांबावे लागले, तर काही प्रवासी अडकून पडले.
हे ही वाचा:
भाजपाचे नेते राज पुरोहित यांचे निधन

पराभवानंतर मुंबई काँग्रेस मध्ये जुंपली

अहवालात स्पष्ट करण्यात आले आहे की हा गोंधळ केवळ हवामान किंवा बाह्य कारणांमुळे झाला नव्हता. विमान चालक आणि कर्मचारी व्यवस्थापनातील कमतरता, अपुरी नियोजन तयारी, तसेच उड्डाण वेळ मर्यादा नियमांची प्रभावी अंमलबजावणी न होणे ही मुख्य कारणे होती. कर्मचारी वेळापत्रक आणि नियंत्रण व्यवस्थेतील चुका परिस्थिती अधिक गंभीर करणाऱ्या ठरल्या.

दंडासोबतच महासंचालनालयाने इंडिगोला ५० कोटी रुपयांची बँक हमी ठेवण्याचे आदेश दिले आहेत, जेणेकरून भविष्यात अशा घटना टाळण्यासाठी आवश्यक सुधारणा केल्या जातील. याशिवाय, कंपनीतील काही वरिष्ठ अधिकाऱ्यांना कठोर इशारे देण्यात आले असून, कामकाजाशी संबंधित जबाबदाऱ्यांमध्ये बदल करण्याचे निर्देशही देण्यात आले आहेत.

महासंचालनालयाने स्पष्ट केले आहे की, विमानसेवा कंपन्यांनी वेगवान विस्तारासोबतच प्रवाशांची सुरक्षितता, सुविधा आणि योग्य नियोजन यांना तितकेच महत्त्व द्यावे. इंडिगोकडूनही नियामकांच्या आदेशांचे पालन करून व्यवस्थेत सुधारणा करण्याचे आश्वासन देण्यात आले आहे. ही कारवाई संपूर्ण भारतीय विमानसेवा क्षेत्रासाठी इशारा मानली जात असून, प्रवाशांच्या हक्कांकडे दुर्लक्ष सहन केले जाणार नाही, असा स्पष्ट संदेश महासंचालनालयाने दिला आहे.