२४ कॅरेट सोन्याचा भाव १.५१ लाखांवर

सराफा बाजारात सोन्या-चांदीच्या दरातील चढ-उतार कायम असून, काल सोन्याच्या दरात घसरण झाल्यानंतर आज, २७ सप्टेंबर २०२६ रोजी सोन्याच्या भावात पुन्हा तेजी पाहायला मिळाली आहे. त्यामुळे सोने खरेदीचा विचार करणाऱ्या ग्राहकांचे लक्ष आजच्या दरांकडे लागले आहे. बुलियन मार्केटनुसार, देशात आज २४ कॅरेट सोन्याचा दर १० ग्रॅमसाठी १ लाख ५१ हजार ४६० रुपये, तर २२ कॅरेट सोन्याचा दर १० ग्रॅमसाठी १ लाख ३८ हजार ८३८ रुपये आहे. दुसरीकडे, चांदीचा दरही वाढला असून एक किलो चांदीसाठी २ लाख ३५ हजार ५० रुपये, तर १० ग्रॅम चांदीसाठी २ हजार ३५१ रुपये मोजावे लागत आहेत. त्यामुळे मौल्यवान धातूंच्या बाजारातील हालचालींकडे ग्राहक आणि गुंतवणूकदारांचे लक्ष आहे.
हे ही वाचा:
दिघी शिपयार्ड; मोठी जहाजं, मोठी स्वप्नं!

परंपरा तुरुंगात पाठवण्याची नसून प्रमोशन देण्याची आहे…

महाराष्ट्रातील प्रमुख शहरांमध्येही सोन्याचे दर जवळपास समान आहेत. मुंबई, पुणे, नागपूर आणि नाशिकमध्ये आज २२ कॅरेट सोन्याचा दर १० ग्रॅमसाठी १ लाख ३८ हजार ५८२ रुपये, तर २४ कॅरेट सोन्याचा दर १ लाख ५१ हजार १८० रुपये आहे. मात्र, हे दर सूचक स्वरूपाचे असून प्रत्यक्ष दागिने खरेदी करताना त्यामध्ये जीएसटी, टीसीएस, उत्पादन शुल्क, स्थानिक कर आणि मेकिंग चार्जेस यांचा समावेश होऊ शकतो. त्यामुळे दुकानातील अंतिम किंमत या बाजारभावापेक्षा वेगळी असण्याची शक्यता आहे. सोन्याच्या दरातील रोजच्या बदलामुळे लग्नसराई, सणासुदी किंवा गुंतवणुकीसाठी सोने खरेदी करणाऱ्यांना योग्य वेळ आणि दराचा विचार करावा लागत आहे.

दरम्यान, सोने खरेदी करताना त्याची शुद्धता समजून घेणेही महत्त्वाचे आहे. २४ कॅरेट सोने सुमारे ९९.९ टक्के शुद्ध असते, तर २२ कॅरेट सोन्यात सुमारे ९१ टक्के शुद्ध सोने असते. २२ कॅरेट सोन्यामध्ये तांबे, चांदी आणि जस्त यांसारख्या इतर धातूंचे मिश्रण केले जाते, त्यामुळे त्यापासून दागिने तयार करणे अधिक सोयीचे ठरते. २४ कॅरेट सोने अधिक शुद्ध असले तरी ते तुलनेने मऊ असल्याने दागिने तयार करण्यासाठी प्रामुख्याने २२ कॅरेट सोन्याचा वापर केला जातो. त्यामुळे आजच्या दरवाढीच्या पार्श्वभूमीवर ग्राहकांनी खरेदीपूर्वी स्थानिक सराफाकडून अंतिम दर, शुद्धता आणि मेकिंग चार्जेसची माहिती घेणे महत्त्वाचे ठरणार आहे.