भारताची भूतानमध्ये मोठी ऊर्जा गुंतवणूक

भारताची वीज क्षेत्रातील कंपनी इंडिया पॉवर कॉर्पोरेशन लिमिटेड (IPCL) भूटानमध्ये सत्तर मेगावॉट क्षमतेचा सौर वीज प्रकल्प उभारणार आहे. या प्रकल्पासाठी IPCL ने भूटानमधील ग्रीन एनर्जी पॉवर प्रायव्हेट लिमिटेड या कंपनीसोबत भागीदारी करार केला आहे. हा प्रकल्प भूटानमधील पॅरो जिल्ह्यात उभारला जाणार आहे. आयपीसीएलची ही गुंतवणूक केवळ एक प्रकल्पापुरती मर्यादित नसून, पुढील पाच वर्षांत भूटानमध्ये एकूण दीड गिगावॉट म्हणजेच एक हजार पाचशे मेगावॉट क्षमतेचे सौर वीज प्रकल्प विकसित करण्याचा कंपनीचा मानस आहे. त्यातील पहिला टप्पा म्हणून हा सत्तर मेगावॉट प्रकल्प राबवला जात आहे.
हे ही वाचा:
“युरोपशी झालेल्या करारामुळे भारत भू-राजकारणाच्या शिखरावर”

“इराणविरुद्ध कारवाई करण्यास अमेरिकन सैन्य तयार”

भूटानमध्ये सध्या प्रामुख्याने जलविद्युत प्रकल्पांद्वारे वीज निर्मिती केली जाते. मात्र, अलीकडच्या काळात देशात उद्योग, डिजिटल सेवा, पायाभूत सुविधा आणि नवीन शहर प्रकल्पांमुळे वीजेची मागणी झपाट्याने वाढत आहे. त्यामुळे भूटान सरकारने पर्यायी ऊर्जेला, विशेषतः सौर ऊर्जेला प्राधान्य देण्याचा निर्णय घेतला आहे.

भूटान सरकारचे उद्दिष्ट दोन हजार चौतीस पर्यंत एकूण पंचवीस हजार मेगावॉट वीज क्षमता निर्माण करण्याचे आहे. यामध्ये पाच हजार मेगावॉट सौर ऊर्जेचा समावेश असणार आहे. आयपीसीएलचा हा प्रकल्प या राष्ट्रीय उद्दिष्टात महत्त्वाची भर घालणारा ठरणार आहे.

हा सौर प्रकल्प सुमारे दोनशे एकर क्षेत्रावर उभारला जाणार असून, ही जमीन दक्षिण दिशेला झुकलेली आहे. त्यामुळे येथे भरपूर सूर्यप्रकाश मिळतो आणि सौर वीज निर्मितीसाठी ही जागा अतिशय उपयुक्त आहे. या प्रकल्पाला जवळच्या विद्युत उपकेंद्राशी जोडण्यात येणार असल्याने वीज वितरण सुलभ होणार आहे. आयपीसीएलच्या संचालकांनी सांगितले की, हा प्रकल्प भारत आणि भूटान यांच्यातील ऊर्जा सहकार्य अधिक मजबूत करणारा आहे. तसेच, स्वच्छ आणि पर्यावरणपूरक ऊर्जेला चालना देण्याच्या दिशेने हे एक महत्त्वाचे पाऊल आहे.

या प्रकल्पामुळे भूटानमध्ये हरित ऊर्जेचा वापर वाढणार असून, स्थानिक रोजगारनिर्मितीलाही चालना मिळणार आहे. भारत-भूटान मैत्री आणि आर्थिक सहकार्याच्या दृष्टीनेही हा प्रकल्प महत्त्वाचा मानला जात आहे.