सप्टेंबरमध्ये भारताच्या उत्पादन क्षेत्राला वेग

भारताच्या उत्पादन क्षेत्राने सप्टेंबरमध्ये दमदार कामगिरी करत सात महिन्यांतील सर्वोच्च वाढ नोंदवली आहे. देशांतर्गत तसेच परदेशातील मागणीत झालेली वाढ, नव्या ऑर्डर्समध्ये झालेली सुधारणा आणि उत्पादनाला मिळालेला वेग यामुळे मॅन्युफॅक्चरिंग क्षेत्राची स्थिती मजबूत झाली आहे. एचएसबीसीच्या मॅन्युफॅक्चरिंग परचेसिंग मॅनेजर्स इंडेक्सनुसार (पीएमआय) सप्टेंबरमध्ये भारताचा उत्पादन पीएमआय ५५.१ वर पोहोचला. ऑगस्टमध्ये हा निर्देशांक ५२.८ होता. पीएमआय ५० च्या वर असणे उत्पादन क्षेत्रातील विस्तार दर्शवते.

सप्टेंबरमध्ये नव्या ऑर्डर्समध्ये फेब्रुवारीनंतरची सर्वाधिक वाढ झाली. वाढलेल्या मागणीचा थेट परिणाम उत्पादनावर झाला असून, उत्पादनवाढीचा वेगही चार महिन्यांच्या उच्चांकावर पोहोचला. देशांतर्गत बाजारासोबतच परदेशातून मिळणाऱ्या ऑर्डर्समध्येही वाढ झाली. ब्राझील, युरोप, संयुक्त अरब अमिराती आणि अमेरिकेसह विविध बाजारपेठांमधून भारतीय उत्पादकांना मागणी मिळाल्याने निर्यात व्यवसायाला चालना मिळाली आहे.
हे ही वाचा:
२ ऑक्टोबरचा ‘नो यूपीआय डे’ आंदोलन मागे

सणासुदीच्या तोंडावर व्यावसायिक एलपीजी सिलिंडर महागला

मागणीतील वाढ लक्षात घेऊन कंपन्यांनी कच्च्या मालाची खरेदी वाढवली असून, तयार मालाचा साठाही वाढवण्यात आला आहे. कंपन्यांचा आगामी व्यवसायाबाबतचा विश्वास वाढला असून, सप्टेंबरमध्ये व्यावसायिक आशावाद चार महिन्यांच्या उच्चांकावर पोहोचला. रोजगाराच्या आघाडीवरही सुधारणा दिसून आली. ऑगस्टमध्ये रोजगारात झालेल्या घटीच्या तुलनेत सप्टेंबरमध्ये कंपन्यांनी अधिक कर्मचाऱ्यांची भरती केली असून, मेनंतर रोजगारवाढीचा हा सर्वाधिक वेग ठरला.

दरम्यान, उत्पादन क्षेत्रासाठी काही आव्हानेही कायम आहेत. इलेक्ट्रॉनिक घटक, औषधनिर्मितीशी संबंधित वस्तू आणि स्टीलसारख्या कच्च्या मालाच्या किमती वाढल्याने कंपन्यांच्या इनपुट खर्चावर दबाव आला आहे. मात्र, खर्चवाढीचा वेग तुलनेने नियंत्रणात राहिल्याने कंपन्यांना त्याचा मोठा फटका बसलेला नाही. एकूणच, सप्टेंबरमधील पीएमआयची वाढ भारतीय उत्पादन क्षेत्राने मंदीनंतर पुन्हा वेग पकडल्याचे संकेत देत असून, मजबूत मागणी आणि वाढत्या ऑर्डर्समुळे उद्योग क्षेत्राला आगामी काळातही चांगली गती मिळण्याची शक्यता निर्माण झाली आहे.