इंडिगोचा मोठा निर्णय; आजपासून उड्डाणांवर ₹४२५ ते ₹२,३०० इंधन अधिभार

भारताची सर्वात मोठी विमान कंपनी इंडिगोने १४ मार्च २०२६ पासून सर्व उड्डाणांवर इंधन अधिभार (फ्युएल सरचार्ज) लावण्याचा निर्णय घेतला आहे. या निर्णयामुळे प्रवाशांना विमानप्रवासासाठी अधिक पैसे मोजावे लागणार आहेत. नवीन अधिभार ₹४२५ ते ₹२,३०० दरम्यान असेल आणि तो प्रवासाच्या मार्गानुसार वेगळा आकारला जाणार आहे. कंपनीने सांगितले की, पश्चिम आशियातील वाढत्या तणावामुळे विमान इंधनाच्या किमतीत मोठी वाढ झाली आहे. त्यामुळे ऑपरेटिंग खर्च वाढल्याने हा अतिरिक्त शुल्क लागू करण्यात आला आहे.
हे ही वाचा:
आकर्षक दिसण्यासाठी उंटांना केला बनावट मेक-अप

भारत आमचा मित्र; होर्मुझ भारतासाठी खुली होईल!

कोणत्या मार्गावर किती अधिभार?

इंडिगोने जाहीर केलेल्या माहितीनुसार अधिभार प्रवासाच्या अंतरानुसार वेगवेगळा असेल. देशांतर्गत उड्डाणे आणि भारतीय उपखंडातील देशांमध्ये जाणाऱ्या प्रवासावर ₹४२५ अतिरिक्त शुल्क आकारले जाईल. मध्य पूर्वेकडील उड्डाणांसाठी ₹९०० अधिभार लागू होईल.

याशिवाय दक्षिण-पूर्व आशिया, चीन, आफ्रिका आणि पश्चिम आशिया या मार्गांवरील उड्डाणांवर ₹१,८०० अतिरिक्त शुल्क आकारले जाणार आहे. तर युरोपमधील देशांकडे जाणाऱ्या प्रवाशांना सर्वाधिक म्हणजे ₹२,३०० अधिभार भरावा लागेल.

इंधन दरवाढीचा परिणाम

विमान कंपन्यांच्या खर्चात एव्हिएशन टर्बाइन फ्युएल (ATF)चा मोठा वाटा असतो. इंधनाच्या किमती वाढल्याने विमान कंपन्यांवर आर्थिक दबाव येतो. पश्चिम आशियातील भू-राजकीय परिस्थितीमुळे इंधनाच्या किमतीत मोठी वाढ झाल्याचे इंडिगोने स्पष्ट केले आहे.

कंपनीच्या मते, इंधनाच्या किंमतींमध्ये झालेली अचानक वाढ सर्व विमान कंपन्यांसाठी मोठे आव्हान ठरत आहे. त्यामुळे संपूर्ण खर्च भरून काढण्यासाठी मोठ्या प्रमाणावर भाडे वाढवावे लागले असते. मात्र प्रवाशांवर कमी भार पडावा म्हणून तुलनेने कमी दराचा इंधन अधिभार लागू करण्यात आला आहे.

एअर इंडियानंतर इंडिगोचा निर्णय

यापूर्वी एअर इंडिया समूहानेही तिकीटांवर इंधन अधिभार लागू करण्याचा निर्णय घेतला होता. इंधनाच्या वाढत्या किंमतीमुळे विमान कंपन्या अशा प्रकारचे अतिरिक्त शुल्क लावण्याकडे वळत आहेत.

प्रवाशांवर परिणाम

या निर्णयामुळे देशांतर्गत आणि आंतरराष्ट्रीय दोन्ही प्रकारच्या उड्डाणांचे तिकीट दर वाढणार आहेत. उदाहरणार्थ, दिल्ली-बंगळुरू किंवा मुंबईसारख्या देशांतर्गत मार्गांवर प्रवास करणाऱ्या प्रवाशांना किमान ₹४२५ अधिक द्यावे लागतील. आंतरराष्ट्रीय मार्गांवर हा अतिरिक्त खर्च आणखी जास्त असेल.

इंडिगोने प्रवाशांची गैरसोय झाल्याबद्दल खेद व्यक्त केला असून परिस्थितीवर लक्ष ठेवून पुढील काळात आवश्यक ते बदल करण्यात येतील, असेही कंपनीने स्पष्ट केले आहे.