भारतीय स्टार्टअप क्षेत्रासाठी अभिमानाची आणि तंत्रज्ञानविश्वात मोठी खळबळ उडवणारी बातमी समोर आली आहे. फिनटेक क्षेत्रातील आघाडीची कंपनी CRED चे संस्थापक कुनाल शाह यांची जगातील सर्वात लोकप्रिय मेसेजिंग प्लॅटफॉर्म असलेल्या व्हॉट्सअॅपच्या ग्लोबल मुख्य कार्यकारी अधिकारीपदी नियुक्ती करण्यात आली आहे. याचवेळी मेटा कंपनीने CRED मध्ये तब्बल ९०० दशलक्ष डॉलर म्हणजेच सुमारे ₹८,५५० कोटींची गुंतवणूक करण्याचा निर्णय घेतला असून त्यामुळे कंपनीचे मूल्यांकन ४.५ अब्ज डॉलरपर्यंत पोहोचले आहे. या दुहेरी घडामोडींमुळे भारतीय स्टार्टअप विश्वात उत्साहाचे वातावरण निर्माण झाले आहे.
व्हॉट्सअॅपचे विद्यमान प्रमुख विल कॅथकार्ट यांच्यानंतर ही जबाबदारी स्वीकारणारे कुनाल शाह हे पहिले भारतीय उद्योजक ठरणार आहेत. मेटाचे मुख्य कार्यकारी अधिकारी मार्क झुकरबर्ग यांनी शाह यांच्या नेतृत्वक्षमतेवर विश्वास व्यक्त करत ही घोषणा केली. गेल्या काही वर्षांत CRED ला देशातील सर्वाधिक नाविन्यपूर्ण आणि वेगाने वाढणाऱ्या फिनटेक कंपन्यांमध्ये स्थान मिळवून देण्यात शाह यांची महत्त्वाची भूमिका राहिली आहे. त्यामुळेच आता त्यांच्यावर व्हॉट्सअॅपच्या भविष्यातील विस्ताराची आणि नव्या व्यावसायिक संधी विकसित करण्याची जबाबदारी सोपवण्यात आली आहे.
हे ही वाचा:
सोन्या-चांदीत मोठी घसरण!
एआयमुळे ओरॅकलने काढले वर्षभरात २१ हजार कर्मचारी
पाकिस्तानविरोधी आंदोलनासाठी पीओकेमध्ये शाळकरी मुले, महिला रस्त्यावर
कतारमधील भारतीयांच्या मृत्यूवर जयशंकर यांनी व्यक्त केला शोक
२०१८ मध्ये सुरू झालेल्या CRED ने अल्पावधीतच भारतीय फिनटेक क्षेत्रात वेगळी ओळख निर्माण केली. उच्च क्रेडिट स्कोअर असलेल्या ग्राहकांसाठी तयार करण्यात आलेल्या या प्लॅटफॉर्मद्वारे क्रेडिट कार्ड बिल पेमेंट, कर्ज सुविधा, विमा, गुंतवणूक आणि विविध आर्थिक सेवा पुरवल्या जातात. सध्या कंपनीकडे सुमारे १.७ कोटी सक्रिय वापरकर्ते असून भारतातील ४० टक्क्यांहून अधिक क्रेडिट कार्ड बिलांचे व्यवहार CRED च्या माध्यमातून होत असल्याचा दावा कंपनीने केला आहे. याशिवाय कंपनी सुमारे ₹२४,००० कोटींच्या कर्ज मालमत्तेचे व्यवस्थापन करत आहे.
कुनाल शाह हे भारतीय उद्योजकतेचे एक यशस्वी उदाहरण मानले जातात. CRED सुरू करण्यापूर्वी त्यांनी FreeCharge या डिजिटल पेमेंट कंपनीची स्थापना केली होती. ही कंपनी त्यांनी सुमारे ₹२,८०० कोटींना विकल्यानंतर त्यांनी CRED ची उभारणी केली. त्यांच्या दूरदृष्टीमुळे आणि ग्राहककेंद्री धोरणांमुळे CRED ने भारतीय स्टार्टअप परिसंस्थेत मजबूत स्थान निर्माण केले आहे.
व्हॉट्सअॅपची जबाबदारी स्वीकारण्यासाठी शाह CRED च्या दैनंदिन व्यवस्थापनातून बाहेर पडणार असून कंपनीच्या नेतृत्वासाठी अंतरिम व्यवस्था करण्यात आली आहे. मेटाच्या नव्या गुंतवणुकीमुळे CRED ला तंत्रज्ञान विकास, कृत्रिम बुद्धिमत्ता आधारित सेवा आणि आर्थिक उत्पादनांच्या विस्तारासाठी मोठी आर्थिक ताकद मिळणार आहे.
भारत हा व्हॉट्सअॅपचा सर्वात मोठा बाजार असून देशात ५० कोटींहून अधिक वापरकर्ते या प्लॅटफॉर्मचा वापर करतात. अशा परिस्थितीत एका भारतीय उद्योजकाकडे व्हॉट्सअॅपच्या जागतिक नेतृत्वाची सूत्रे जाणे हा केवळ वैयक्तिक यशाचा क्षण नसून भारतीय स्टार्टअप क्षेत्राच्या वाढत्या जागतिक प्रभावाचाही पुरावा मानला जात आहे. मेटाची मोठी गुंतवणूक आणि कुनाल शाह यांची नियुक्ती या दोन्ही घडामोडी आगामी काळात जागतिक तंत्रज्ञान क्षेत्रात भारताची भूमिका अधिक मजबूत करण्यास मदत करतील.