शाहबाज शरीफ यांच्या उपस्थितीत पहलगाम हल्ल्याचा एससीओ देशांकडून तीव्र निषेध!

सोमवारी (१ सप्टेंबर) चीनमधील तियानजिन येथे झालेल्या शांघाय सहकार्य संघटनेच्या (एससीओ) शिखर परिषदेत जारी करण्यात आलेल्या तियानजिन जाहीरनाम्यात जम्मू आणि काश्मीरमधील पहलगाम येथे झालेल्या दहशतवादी हल्ल्याचा तीव्र निषेध करण्यात आला. २२ एप्रिल रोजी झालेल्या या हल्ल्यात २६ जणांचा मृत्यू झाला होता. जाहीरनाम्यात सदस्य देशांच्या नेत्यांनी पीडितांच्या आणि जखमींच्या कुटुंबियांना तीव्र शोक आणि सहानुभूती व्यक्त केली. त्यांनी पुढे म्हटले की अशा हल्ल्यांचे दोषी, आयोजक आणि प्रायोजकांना न्याय मिळवून दिला पाहिजे.

पाकिस्तानचे पंतप्रधान शेहबाज शरीफ यांच्या उपस्थितीमुळे एससीओच्या सामूहिक निषेधाला अधिक महत्त्व प्राप्त झाले आहे, कारण भारताने पाकिस्तानवर दहशतवाद आणि सीमेपलीकडून घुसखोरी वाढवल्याचा आरोप बराच काळ केला आहे.

तियानजिन जाहीरनाम्यात म्हटले आहे की, “सदस्य राष्ट्रे सर्व प्रकारच्या दहशतवादाचा तीव्र निषेध करतात. आम्ही पुन्हा सांगतो की दहशतवादाविरुद्धच्या लढाईत कोणतेही दुटप्पी निकष स्वीकारार्ह राहणार नाहीत. आम्ही आंतरराष्ट्रीय समुदायाला दहशतवादाचा मुकाबला करण्याचे आवाहन करतो, ज्यामध्ये दहशतवाद्यांच्या सीमापार हालचाली रोखणे समाविष्ट आहे.” 

संघटनेने दहशतवाद, फुटीरतावाद आणि अतिरेकीवादाचा मुकाबला करण्याच्या आपल्या वचनबद्धतेचा पुनरुच्चार केला आणि स्पष्ट केले की कोणतेही राजकीय किंवा आर्थिक हित साध्य करण्यासाठी दहशतवादी गटांचा वापर अस्वीकार्य आहे. शिखर परिषदेतील ही घोषणा केवळ भारताची भूमिका मजबूत करत नाही तर पाकिस्तानसाठी राजनैतिकदृष्ट्या अस्वस्थ परिस्थिती निर्माण करते असे तज्ञांचे मत आहे.

हे ही वाचा :