शुक्रवारी भारतीय शेअर बाजारात मोठी घसरण पाहायला मिळाली. दिवसअखेर बीएसई सेन्सेक्स १,०९७ अंकांनी घसरून ७८,९१८.९० वर बंद झाला, तर निफ्टी ५० निर्देशांक ३१५.४५ अंकांनी घसरून २४,४५०.४५ वर स्थिरावला. दिवसाभरातील व्यवहारात बाजारावर जोरदार विक्रीचा दबाव राहिल्याने गुंतवणूकदारांचे नुकसान झाले. या घसरणीमागे प्रामुख्याने बँकिंग आणि वित्तीय क्षेत्रातील शेअर्समध्ये झालेली विक्री कारणीभूत ठरली. विशेषतः ICICI Bank, State Bank of India (SBI) यांसारख्या मोठ्या बँकांच्या शेअर्समध्ये घसरण झाली. ICICI Bank चा शेअर सुमारे ३.३९ टक्क्यांनी घसरून १,३१३ रुपयांवर आला, तर SBI च्या शेअर्समध्येही जवळपास २ टक्क्यांहून अधिक घसरण झाली.
हे ही वाचा:
‘लाडकी बहिण योजना’ सुरूच राहणार!
कच्चे तेल १०० डॉलरवर गेल्यास भारताच्या अर्थव्यवस्थेला मोठा धक्का
आखाती देश परदेशी गुंतवणूक कमी करण्याच्या तयारीत
बाजारातील बहुतांश क्षेत्रीय निर्देशांक लाल निशाणीत बंद झाले. निफ्टी बँक निर्देशांक सुमारे २.१५ टक्क्यांनी घसरला, ज्यामुळे बाजारावर मोठा दबाव आला. त्याचबरोबर रिअल्टी, ऑटो आणि PSU बँक क्षेत्रातही घसरण दिसून आली. विशेषतः Bank of India आणि Punjab National Bank यांसारख्या सार्वजनिक क्षेत्रातील बँकांच्या शेअर्समध्ये विक्री वाढली.
मिडकॅप आणि स्मॉलकॅप शेअर्समध्येही विक्रीचा कल कायम राहिला. बाजारातील ५० पैकी ४० हून अधिक निफ्टी कंपन्यांचे शेअर्स तोट्यात बंद झाले. यामुळे व्यापक बाजारातही कमकुवतपणा दिसून आला.
विश्लेषकांच्या मते, मध्यपूर्वेतील वाढत्या तणावामुळे जागतिक बाजारात अस्थिरता निर्माण झाली आहे, त्याचा परिणाम भारतीय बाजारावरही होत आहे. कच्च्या तेलाच्या किमती वाढण्याची शक्यता, जागतिक गुंतवणूकदारांची सावध भूमिका आणि परदेशी गुंतवणूकदारांकडून होणारी विक्री यामुळे गुंतवणूकदारांमध्ये भीतीचे वातावरण आहे.
या आठवड्यात बाजारात सलग दुसऱ्या आठवड्यात घसरण झाली असून निफ्टी निर्देशांक सुमारे ३ टक्क्यांनी खाली आला. यामुळे निर्देशांकाने जवळपास १० महिन्यांतील नीचांक पातळी गाठली. तसेच निफ्टी बँक निर्देशांकानेही मोठा साप्ताहिक तोटा नोंदवला, जो डिसेंबर २०२४ नंतरचा सर्वात मोठा घसरणीचा आठवडा मानला जात आहे.
तज्ज्ञांच्या मते, पुढील काही दिवस बाजारात भूराजकीय परिस्थिती, कच्च्या तेलाच्या किमती आणि परदेशी गुंतवणूकदारांची हालचाल या गोष्टी महत्त्वाच्या ठरणार आहेत. परिस्थिती स्थिर होईपर्यंत बाजारात अस्थिरता कायम राहण्याची शक्यता व्यक्त केली जात आहे.
