पश्चिम बंगालमध्ये १,१५० जिलेटिन कांड्या, ९८९ डेटोनेटर्ससह २१ शस्त्रे जप्त

पश्चिम बंगालमध्ये अवैध स्फोटके आणि शस्त्रसाठ्याविरोधात पोलिसांच्या विशेष कृती दलाने (एसटीएफ) मोठी कारवाई केली आहे. बीरभूम आणि पश्चिम वर्धमान जिल्ह्यांत दोन स्वतंत्र ठिकाणी छापे टाकून १,१५० जिलेटिन कांड्या, ९८९ डेटोनेटर्स, सुमारे ९,९०० मीटर डेटोनेटिंग कॉर्ड आणि २१ बेकायदा बंदुका जप्त करण्यात आल्या आहेत. या कारवाईत स्फोटकांच्या साठ्याप्रकरणी दोन जणांना ताब्यात घेण्यात आले असून, शस्त्रसाठ्याप्रकरणीही तपास सुरू आहे.

पहिली कारवाई बीरभूम जिल्ह्यातील मुरारई पोलीस ठाण्याच्या हद्दीतील बारुआ गोपालपूर गावात करण्यात आली. गुप्तचर यंत्रणांकडून मिळालेल्या ठोस माहितीनंतर पश्चिम बंगाल पोलिसांच्या एसटीएफने स्थानिक पोलिसांच्या मदतीने एका अनधिकृत गोदामावर छापा टाकला. या झडतीदरम्यान मोठ्या प्रमाणात स्फोटक सामग्री आढळून आली. त्यामध्ये १,१५० जिलेटिन कांड्या, ९८९ डेटोनेटर्स आणि ९,९०० मीटर डेटोनेटिंग कॉर्डचा समावेश आहे. या प्रकरणी मोहम्मद रेजा शेख ऊर्फ गुडा आणि मुकेश सिंह या दोघांना अटक करण्यात आली आहे.

या स्फोटकांचा साठा नेमका कुठून आणण्यात आला होता आणि त्याचा वापर कोणत्या कारणासाठी होणार होता, याचा तपास पोलिसांकडून केला जात आहे. तसेच या आरोपींचे अन्य गुन्हेगारी टोळ्यांशी किंवा मोठ्या नेटवर्कशी संबंध आहेत का, याचाही शोध घेतला जात आहे. स्फोटकांचा वापर एखाद्या मोठ्या गुन्हेगारी किंवा दहशतवादी कारवायांसाठी करण्याची योजना होती का, या शक्यतेसह सर्व बाजूंनी तपास सुरू असल्याचे अधिकाऱ्यांनी सांगितले.

दरम्यान, दुसरी कारवाई पश्चिम वर्धमान जिल्ह्यातील पांडवेश्वर परिसरात करण्यात आली. येथे एका कथित गुन्हेगाराकडून २१ बेकायदा बंदुका आणि ६५ जिवंत काडतुसे जप्त करण्यात आली. जप्त केलेल्या शस्त्रांमध्ये सहा लांब बंदुका, सात एमएमच्या चार पिस्तुली आणि ११ देशी बनावटीच्या पाइपगनचा समावेश आहे. या आरोपीचे अवैध कोळसा व्यवसायाशी संबंधित नेटवर्कशी संबंध असल्याचा संशय व्यक्त करण्यात आला आहे.

हे ही वाचा:

आशुतोष रांका, सौरव दासची गुन्हे शाखेकडून पाच तास चौकशी

अमेरिकेच्या मध्यावधी निवडणुकीत भारतीय वंशाच्या उमेदवारांचा डंका

३३ वर्षांनंतर जंतरमंतर सर्वसामान्यांसाठी खुले!

लष्करासाठी गेमचेंजर ठरणार जीपीएस शिवाय ड्रोनला दिशा देणारे तंत्रज्ञान

पश्चिम बंगालचे मुख्यमंत्री शुभेंदू अधिकारी यांनी सोशल मीडिया प्लॅटफॉर्म ‘एक्स’वर या कारवाईची माहिती दिली. पोलिसांच्या सतर्कतेमुळे अवैध शस्त्रे आणि स्फोटकांचा मोठा साठा उघडकीस आल्याचे त्यांनी म्हटले आहे. राज्यात गुन्हेगारी टोळ्या आणि बेकायदा शस्त्रसाठ्याविरोधात कठोर भूमिका घेतली जाईल, असेही त्यांनी नमूद केले.