न्यायालयाच्या आवारातून बेड्यांसह एक आरोपी पळून गेल्याची घटना घडली.
पळून गेलेल्या आरोपीला काही तासांतच भायखळा पोलिसानी नागपाडा येथून अटक केली आहे. मिराज फैय्याज खान (२५) असे अटक आरोपीचे नाव आहे. मिराज याला भायखळा पोलिसांनी चोरीच्या गुन्ह्यात अटक केली होती,मंगळवारी त्याला शिवडी न्यायालयात हजर करण्यात आले होते. न्यायालयाने त्याला पोलीस कोठडी सुनावली होती. आरोपीला न्यायालयाच्या बाहेर आणून पोलीस वाहनात बसवत असताना त्याने पोलिसांच्या हाताला झटका देऊन बेड्यासह पळ काढला होता.
भायखळा पोलीस ठाण्याचे पथक त्याच्या मागावर होते, आरोपी मिराज हा नागपाडा येथे लपून बसला असल्याची माहिती मिळताच पोलिसानी नागपाडा कामाठीपुरा ५वी गल्ली येथून अटक केली आहे.
हे ही वाचा:
उद्धव यांचा दसरा मेळावा म्हणजे पवार आणि सोनियांच्या मिश्र विचारांचा
सपा नेत्याने दिली होती सेंट्रल व्हिस्टा बॉम्बने उडवण्याची धमकी; पोलिसांनी केली अटक
पोलिसांच्या हातावर झटका देऊन पळून गेल्याप्रकरणी भायखळा पोलीसानी त्याच्याविरुद्ध दुसरा गुन्हा दाखल केला असून तपास सुरू असल्याची माहिती भायखळा पोलीस ठाण्याचे वरिष्ठ पोलीस निरीक्षक अशोक खोत यांनी दिली.
अशा प्रकारच्या घटना अनेकवेळा घडत असतात. लघवीला जाण्याच्या बहाण्याने पोलिसांना गुंगारा देऊन आरोपी निसटल्याचे प्रकार यापूर्वीही घडलेले आहेत. कधी कधी वैद्यकीय तपासणीसाठी आलेले असताना पोलिसांना चकमा देऊन आरोपी निसटतात.
