आसाममधील नलबारी जिल्ह्यातील मुकलमुआ येथे सोमवारी (१ जून) पोलिसांसोबत झालेल्या चकमकीत मुख्य आरोपी रोज अली उर्फ आसिफ खान ठार झाला. १९ वर्षीय हिंदू युवक मधुरज्या बर्मन याच्या निर्घृण हत्येचा तसेच त्याची १८ वर्षीय चुलत बहीण मृदुमुद्रा डेका हिच्यावर जीवघेणा हल्ला केल्याचा आरोप त्याच्यावर होता. पोलिस कारवाईदरम्यान आरोपीने पळून जाण्याचा प्रयत्न करत पोलिसांची सर्व्हिस रिव्हॉल्व्हर हिसकावून गोळीबार केला. त्यानंतर आत्मसंरक्षणासाठी पोलिसांनी केलेल्या प्रत्युत्तरात तो ठार झाला.
ही धक्कादायक घटना तेव्हा घडली, जेव्हा मधुरज्या बर्मन आणि मृदुमुद्रा डेका हे नलबारी शहरातून पुस्तके खरेदी करून स्कूटरवरून घरी परतत होते. मुकलमुआच्या गंगापूर परिसरात रोज अली आणि त्याचा साथीदार आशिक अली यांनी त्यांना अडवले. मृदुमुद्रावर लग्नासाठी दबाव टाकत असलेल्या रोज अलीचा प्रस्ताव तिने नाकारला होता. त्याच रागातून त्याने दोघांवर कोयत्याने सपासप वार केल्याचा आरोप आहे. या हल्ल्यात गंभीर जखमी झालेल्या मधुरज्या बर्मन यांना नलबारी मेडिकल कॉलेज रुग्णालयात दाखल करण्यात आले, मात्र उपचारादरम्यान त्यांचा मृत्यू झाला. तर मृदुमुद्रा डेका हिला गंभीर अवस्थेत Gauhati Medical College and Hospital येथे हलवण्यात आले असून ती सध्या अतिदक्षता विभागात उपचार घेत आहे.
रुग्णालय प्रशासनाने दिलेल्या माहितीनुसार, तिच्या डोक्यावर, जबड्यावर, उजव्या हातावर, पाठीवर आणि खांद्याजवळ गंभीर जखमा असून तिची प्रकृती चिंताजनक आहे. पीडित मुलीच्या कुटुंबीयांनी दावा केला की, रोज अली बराच काळ तिचा आणि कुटुंबाचा छळ करत होता. मुलीच्या आईने सांगितले की, प्रस्ताव नाकारल्यानंतर आरोपीने गंभीर परिणाम भोगावे लागतील, अशी धमकी दिली होती.
हत्येनंतर आरोपी मुकलमुआ परिसरातील नदीमधील बेटावर लपून बसला होता. नलबारीचे वरिष्ठ पोलिस अधीक्षक बिबेकानंद दास यांनी सांगितले की, आरोपीला अटक केल्यानंतर तो पोलिसांना हत्येत वापरलेले शस्त्र लपवलेल्या ठिकाणी घेऊन गेला. मात्र तेथे पोहोचताच त्याने पोलिस कर्मचाऱ्याची सर्व्हिस गन हिसकावून घेतली आणि गोळीबार करत पळून जाण्याचा प्रयत्न केला.
हे ही वाचा:
बंगालच्या उपसागरात ४.६ रिश्टर तीव्रतेचा भूकंप
पाकिस्तानात बाजारपेठा रात्री ८ वाजता होणार बंद!
वेदांता समूहावर ईडीची छापेमारी
बलात्कार पीडितेची ओळख उघड केल्याप्रकरणी सौरभ भारद्वाज यांच्यावर एफआयआर
पोलिसांच्या माहितीनुसार, आरोपीने सुमारे चार फेऱ्या गोळीबार केला. प्रत्युत्तरादाखल पोलिसांनी केलेल्या गोळीबारात त्याच्या छातीत गोळी लागली. त्याला तातडीने रुग्णालयात नेण्यात आले, मात्र अतिरक्तस्रावामुळे डॉक्टरांनी त्याला मृत घोषित केले. या घटनेनंतर संपूर्ण आसाममध्ये संतापाची लाट उसळली आहे. मृत मधुरज्या बर्मन हे All Assam Students’ Union चे सक्रिय सदस्य होते. त्यामुळे संघटनेच्या कार्यकर्त्यांसह स्थानिक नागरिकांनी न्यायाच्या मागणीसाठी आंदोलन केले. तसेच विश्व हिंदू परिषद, बजरंग दल आणि हिंदू सुरक्षा सेना यांसारख्या संघटनांनी निषेध मोर्चे काढून कुमारीकाटा मार्ग रोखला.