दिल्लीतील लाल किल्ल्याजवळ सोमवारी संध्याकाळी झालेल्या स्फोटाचा तपास सुरू आहे. याच पार्श्वभूमीवर आता फरिदाबादच्या अल-फलाह विद्यापीठात छापेमारी करण्यात येत आहे. स्फोटातील संशयित हल्लेखोर डॉ. उमर मोहम्मद हा या विद्यापीठात शिकवत होता. सोमवारी फरिदाबादमध्ये उघडकीस आलेला दहशतवादी मॉड्यूल, ज्यामध्ये डॉ. मुझम्मिल शकीलला अटक करण्यात आली होती, तो देखील याच विद्यापीठात शिकवत होता. याशिवाय कटात सहभागी असलेल्या अल- फलाह विद्यापीठातील एका महिला डॉक्टरचाही सहभाग आहे. ११ नोव्हेंबरच्या पहाटेपासून धौज परिसरातील अनेक ठिकाणी शोध मोहीम सुरू आहे, ज्यामध्ये ८०० हून अधिक फरिदाबाद पोलिस कर्मचारी सहभागी आहेत.
सोमवारी संध्याकाळी दिल्लीतील लाल किल्ला मेट्रो स्टेशनजवळ एका चालत्या कारमध्ये मोठा स्फोट झाला, ज्यामध्ये १० जण ठार आणि २० जण जखमी झाले. या स्फोटाचे आणि फरिदाबाद दहशतवादी मॉड्यूलशी संबंध असल्याचे समोर आले आहे. हल्ल्यात अमोनियम नायट्रेटचा वापर करण्यात आला होता आणि फरिदाबादमधील मुझम्मिलच्या दोन लपण्याच्या ठिकाणांमधून त्याचा साठा जप्त करण्यात आला आहे.
यापूर्वी फरीदाबादमधील धौज येथील काश्मिरी डॉक्टर मुझम्मिल याच्या भाड्याच्या घरात सुमारे ३६० किलोग्रॅम संशयित अमोनियम नायट्रेट आणि शस्त्रे आणि दारूगोळ्यांचा साठा जप्त करण्यात आला. एका गावात त्याच्या लपण्याच्या ठिकाणी २,५०० किलोग्रॅमपेक्षा जास्त स्फोटके देखील सापडली. या दहशतवादी मॉड्यूलचा पर्दाफाश आणि अटक झाल्यानंतर काही तासांतच दिल्लीत स्फोट झाला.
हेही वाचा..
“भारतावरील कर कमी करणार पण…” काय म्हणाले डोनाल्ड ट्रम्प?
लाल किल्ला बॉम्बस्फोटातील संशयित, फरीदाबाद मॉड्यूलच्या डॉ. उमरचा फोटो आला समोर
बिहार निवडणूक २०२५: शेवटच्या टप्प्यात २० जिल्ह्यांमधील १२२ जागांसाठी मतदान!
लाल किल्ला स्फोट : सीसीटीव्ही फुटेजमधून मिळाली महत्त्वाची माहिती
हरियाणा पोलिसांनी जम्मू आणि काश्मीर पोलिसांच्या सहकार्याने फरिदाबादच्या धौज भागातून डॉ. मुझम्मिल याला अटक केली आणि त्याच्या भाड्याच्या घरातून स्फोटक साहित्य, शस्त्रे आणि टायमर जप्त केला. अधिकाऱ्याने सांगितले की, दिल्ली पोलिसांनी संध्याकाळी उशिरा कार मालक मोहम्मद सलमानला ताब्यात घेतले आणि त्याची गाडीबद्दल चौकशी केली. त्याने सांगितले की, त्याने दीड वर्षांपूर्वी ओखला येथील देवेंद्र नावाच्या व्यक्तीला गाडी विकली होती. अद्याप कोणत्याही संघटनेने या स्फोटाची जबाबदारी स्वीकारलेली नाही.
