मुंबईत बनावट पोलीस अधिकाऱ्यांचा बनाव करून एका व्यावसायिकाला लुटणाऱ्या टोळीचा पर्दाफाश झाला आहे. या टोळीतील तीन महिलांसह चार जणांना मुंबई पोलिसांच्या आझाद मैदान पोलिसांनी अटक केली आहे. या आरोपींनी व्यावसायिकाकडून ९०,००० ऑनलाईन ट्रान्सफर करून घेतले, तसेच ३.५ लाखांची सोन्याची साखळीही लुटली.
या प्रकरणी दक्षिण मुंबईत राहणाऱ्या निशीलकुमार मब्जा यांनी तक्रार दाखल केली. तक्रारदाराच्या म्हणण्यानुसार, २७ जुलै रोजी संध्याकाळी ६ वाजता मुख्य आरोपी फराहने सहा अनोळखी महिला आणि एका पुरुषासोबत त्यांच्या घरात प्रवेश केला. त्यांनी पोलीस असल्याचा बनाव केला आणि घरावर ‘छापा’ टाकण्याच्या बहाण्याने निशीलकुमार यांच्याशी गैरवर्तन केले. खोट्या प्रकरणात अडकवण्याची धमकी देऊन त्यांनी २ लाखांची मागणी केली.
घटनेदरम्यान, आरोपींनी निशीलकुमार यांच्याकडून सुमारे ४० ग्रॅम वजनाची आणि सुमारे ३.५ लाख किमतीची सोन्याची साखळी जबरदस्तीने हिसकावून घेतली. एवढंच नव्हे, तर त्यांनी फातिमा युसूफ खानच्या नावावर असलेल्या खात्यात ९०,००० फोनपे द्वारे ट्रान्सफर करण्यास भाग पाडले.
या घटनेची तक्रार दाखल झाल्यावर पोलिसांनी तांत्रिक माहितीच्या आधारे तपास सुरू केला. दिंडोशी पोलिसांच्या मदतीने गोरेगाव येथील शिवशाही कॉलनीतून चार आरोपींना अटक करण्यात आली. अटक केलेल्या आरोपींची नावे अमिना उर्फ फराह साजिद खान (४१), फातिमा युसूफ उर्फ अफसर खान (४०), सबिना झरनान कुरेशी (३६) आणि रफिक महमंद शेख (४०) अशी आहेत. हे सर्व गोरेगाव येथील रहिवासी आहेत.
हे ही वाचा:
कोलकातामध्ये बांगलादेशी मॉडेलला अटक!
माजी जेडी(एस) खासदार प्रज्वल रेवण्णा बलात्कार प्रकरणात दोषी!
उपराष्ट्रपतीपदाची निवडणूक ९ सप्टेंबरला!
रुग्णालयात उंदराने रुग्णाला कुरतडलं
प्राथमिक चौकशीत या चौघांचा गुन्ह्यात थेट सहभाग असल्याचे समोर आले आहे. पोलिसांनी सांगितले की, या प्रकरणात आणखी दोन फरार आरोपींचा शोध सुरू आहे. चोरीला गेलेली सोन्याची साखळी अद्याप पोलिसांना मिळालेली नाही. तसेच, लुटलेली रक्कम इतर कोणत्या खात्यात ट्रान्सफर केली आहे, याचाही तपास सुरू आहे. या प्रकरणातील पुढील तपास आणि फरार आरोपींना पकडण्यासाठी पोलिसांनी आरोपींची कोठडीची मागणी केली आहे. या आरोपींचा इतर गुन्ह्यांमध्येही सहभाग आहे का, याचा तपास पोलीस करत आहेत.
