टायगर श्रॉफ गोळीबार प्रकरणातील आरोपी शूटरचा फोटो समोर

बॉलिवूड अभिनेता टायगर श्रॉफ यांच्यावर झालेल्या गोळीबार प्रकरणातील आरोपी शूटरचा पहिला फोटो समोर आला आहे. जुहू परिसरात रविवारी संध्याकाळी झालेल्या हल्ल्यानंतर आरोपींच्या हालचालींचा तपास पोलीस करत असून, त्यांनी वापरलेली दुचाकी अंधेरी रेल्वे स्थानकाजवळ जप्त करण्यात आली आहे.

घटनास्थळाजवळील सीसीटीव्हीमधून मिळालेल्या छायाचित्रात दोन संशयित पांढऱ्या रंगाचे शर्ट घातलेले दिसत आहेत. त्यापैकी एकाने प्यूमा (Puma) लोगो असलेली काळी टोपी घातली आहे. पोलिसांकडून दोघांची ओळख पटवण्याचे प्रयत्न सुरू आहेत.

दरम्यान, आरोपींनी हल्ल्यानंतर अंधेरी रेल्वे स्थानकाजवळ सोडून दिलेली दुचाकी पोलिसांनी जप्त केली आहे. प्राथमिक तपासात ही दुचाकी मुंबईत नोंदणीकृत असल्याचे समोर आले असून, तिची नोंदणी, नंबर प्लेट तसेच चेसिस आणि इंजिन क्रमांकाची पडताळणी करून तिचा संपूर्ण इतिहास शोधला जात आहे.

आरोपी हल्ल्यानंतर कोणत्या मार्गाने पसार झाले, याचा माग काढण्यासाठी पोलिसांकडून परिसरातील सीसीटीव्ही फुटेजचे बारकाईने विश्लेषण केले जात आहे.

हे ही वाचा:

दीपक, प्रशांत भूषण हे तर मोहरे रिजिम चेंजच्या खेळाचा रिंगमास्टर वेगळाच |

अभिनेता टायगर श्रॉफच्या गाडीवर गोळीबार, इजा नाही

स्वाती मोहिते यांना केशवसृष्टी पुरस्कार

अराजकवाद्यांमुळे फ्रान्स, इटलीत वणवा

तिसऱ्या साथीदाराचाही सहभाग

तपासात समोर आलेल्या माहितीनुसार, या दोघांसोबत तिसराही एक साथीदार होता, जो मोटारसायकलवर घटनास्थळी आला होता.

सीसीटीव्ही फुटेजमध्ये एक संशयित टायगर श्रॉफ यांच्या दिशेने सलग अनेक गोळ्या झाडताना दिसतो, तर दुसरा संशयितही गोळी झाडण्याचा प्रयत्न करताना दिसत आहे. मात्र, त्याच्या शस्त्रातून प्रत्यक्षात गोळी सुटली की नाही, हे अद्याप स्पष्ट झालेले नाही.

तिसरा साथीदार मोटारसायकलवरच थांबलेला दिसत असून, हल्ल्यानंतर तिघांनाही त्वरित पळून जाण्यास मदत करण्यासाठी तो तयार असल्याचे फुटेजवरून दिसून येते. यानंतर तिघेही मोटारसायकलवरून घटनास्थळावरून फरार झाल्याचे फुटेजमध्ये दिसते.

३६ वर्षीय टायगर श्रॉफ फुटबॉल सामना खेळून निघत असताना हा गोळीबार झाला. या हल्ल्याची जबाबदारी लॉरेन्स बिश्नोई टोळीने स्वीकारल्याचा दावा केला असून, अभिनेता सलमान खानसोबत काम करणाऱ्यांना नव्याने धमक्याही दिल्या आहेत.

या हल्ल्यात टायगर श्रॉफ बचावले असले, तरी त्यांचे चालक फिरदौस आणि चौहान नावाचा एका रिक्षाचालक जखमी झाला आहे.

गोळीबारानंतर वाहनाच्या डाव्या बाजूला बसलेले टायगर श्रॉफ चालकाच्या जागेकडे सरकल्याची माहितीही समोर आली आहे.

१५ पथकांकडून तपास

या प्रकरणाच्या तपासासाठी मुंबई गुन्हे शाखा आणि स्थानिक पोलिसांसह १५ विशेष पथके तयार करण्यात आली आहेत.

फॉरेन्सिक पथकाने घटनास्थळावरून बॅलिस्टिक पुरावे गोळा केले असून, वाहनाची तपासणी करून नेमक्या किती गोळ्या झाडण्यात आल्या, याचा तपास सुरू आहे.

फडणवीस आणि शिंदे यांची प्रतिक्रिया

गृहमंत्रीपदाची जबाबदारी सांभाळणारे मुख्यमंत्री देवेंद्र फडणवीस यांनी मुंबई पोलीस आयुक्त देवेन भारती आणि टायगर श्रॉफ यांच्याशी दूरध्वनीवरून चर्चा केली. तपासाला गती देऊन आरोपींना लवकरात लवकर अटक करण्याचे निर्देश त्यांनी पोलिसांना दिले.

उपमुख्यमंत्री एकनाथ शिंदे यांनीही हल्ल्यानंतर टायगर श्रॉफ यांच्या घरी जाऊन त्यांची भेट घेतली. या भेटीदरम्यान त्यांनी टायगर यांच्या उजव्या हाताला दारूगोळ्याच्या ज्वाळांमुळे भाजल्याच्या खुणा असल्याचे सांगितले.

शिंदे यांनी या घटनेला अत्यंत गंभीर संबोधत, मुंबईत पुन्हा गँगवॉरचे वातावरण निर्माण करू देणार नाही, असा इशारा दिला आणि दोषींवर कठोर कारवाई करण्याचे आश्वासन दिले.