गुजरातमध्ये भारतीय हद्दीत घुसलेल्या चार पाकिस्तानी मच्छीमारांना अटक

भारत-पाकिस्तान सीमेवरील गुजरातच्या कच्छ जिल्ह्यात सर क्रीक परिसरात सीमा सुरक्षा दलाने (बीएसएफ) चार पाकिस्तानी मच्छीमारांना ताब्यात घेतले आहे. हे मच्छीमार भारतीय जलक्षेत्रात प्रवेश करून खेकडे पकडत असल्याची माहिती अधिकाऱ्यांनी दिली. या कारवाईदरम्यान त्यांच्याकडील फायबरची मासेमारी नौकाही जप्त करण्यात आली. रविवारी, २५ ऑक्टोबर रोजी ही कारवाई करण्यात आली.

माहितीनुसार, सर क्रीक परिसरात पाकिस्तानी मच्छीमार भारतीय जलक्षेत्रात असल्याची विशिष्ट गुप्त माहिती बीएसएफला मिळाली होती. त्यानंतर जवानांनी कारवाई करत चारही जणांना ताब्यात घेतले. कादिर थायमोर, मोहम्मद मुसा, अझगर थायमोर आणि अहसान जाट अशी ताब्यात घेण्यात आलेल्या मच्छीमारांची नावे आहेत. हे चौघेही पाकिस्तानच्या सिंध प्रांतातील चाच जान खान गावचे रहिवासी असल्याचे सांगण्यात आले आहे.

हे ही वाचा:

ब्राझीलमध्ये डाव्या विचारसरणीचे लुला दा सिल्व्हा चौथ्यांदा राष्ट्राध्यक्ष

नर्मदा नदीकाठी मतदार ओळखपत्रांचा खच

वृक्षतोडीचे ‘फेक नरेटिव्ह’ पसरवून क्लीन एनर्जी रोखू नका!

टेरर फंडिंगप्रकरणी काश्मीरमध्ये चार महिलांसह सहा जणांना अटक

सर क्रीक हा कच्छच्या रणातील दलदलीचा आणि भरती-ओहोटीचा प्रभाव असलेला अरुंद जलमार्ग आहे. हा परिसर गुजरात आणि पाकिस्तानच्या सिंध प्रांतादरम्यान असून, भारत-पाकिस्तानच्या सागरी सीमेजवळ असल्याने सुरक्षेच्या दृष्टीने अत्यंत संवेदनशील मानला जातो. येथील बदलते जलमार्ग, दलदलीचा प्रदेश आणि भरती-ओहोटीमुळे गस्त घालणे सुरक्षा दलांसाठी आव्हानात्मक ठरते. या भागात मासेमारी करताना पाकिस्तानी मच्छीमार भारतीय जलक्षेत्रात प्रवेश करण्याच्या घटना यापूर्वीही घडल्या आहेत. अशा घटनांमध्ये सुरक्षा दलांकडून संबंधितांना ताब्यात घेऊन त्यांच्या ओळखीची आणि भारतीय हद्दीत प्रवेश करण्यामागील परिस्थितीची पडताळणी केली जाते.