दिल्लीत घडलेल्या एका गुन्ह्यानंतर अक्षय कुमारच्या ‘स्पेशल २६’ चित्रपटाची आठवण झाली आहे. घरातील एका मोलकरीणीने दिल्लीतील तिच्या मालकाच्या घरी बनावट अंमलबजावणी संचालनालयाकडून (ईडी) छापा टाकल्याचे भासवत लुटमारीचा कट रचला होता. या प्रकरणात घरकाम करणाऱ्या रेखा देवीसह दोन महिलांना अटक करण्यात आली आहे, तर इंडो- तिबेटीयन बॉर्डर पोलिस (आयटीबीपी) चा एक कर्मचारी आणि एक निवृत्त लष्करी जवान असे तीन पुरुष संशयित फरार आहेत.
या महिन्याच्या सुरुवातीला, पोलिसांचा गणवेश परिधान केलेले तीन पुरूष ८६ वर्षीय निवृत्त वरिष्ठ वास्तुविशारद आर. सी. सभरवाल यांच्या न्यू फ्रेंड्स कॉलनीतील निवासस्थानी जबरदस्तीने घुसले आणि ते ईडी अधिकारी असल्याचा दावा करत होते. त्यांनी कुटुंबातील सदस्यांना धमकावले, त्यांचे मोबाईल फोन हिसकावून घेतले आणि घरात शोध मोहीम राबवत त्यांना कोंडून ठेवले.
बनावट ईडी अधिकारी त्यांच्या बलेनो कारमधून आले, जी टोळीतील सदस्य उपदेश सिंग थापा याच्या नावाने नोंदणीकृत आहे. गुन्हेगार पूर्णपणे तयार होते. त्यांनी पोलिसांचा गणवेश परिधान केला होता, ज्यामध्ये आयटीबीपीच्या डेप्युटी कमांडंटचा गणवेश देखील होता. संशय येऊ नये म्हणून त्यांच्याकडे बनावट ओळखपत्रे आणि वायरलेस हँडसेट देखील होते. या घटनेतील सर्वात धक्कादायक बाब म्हणजे घरकाम करणाऱ्या रेखा देवी हिने गुन्हेगारांना सर्व माहिती दिली होती. तिने तिच्या सहकाऱ्यांना घरात उपस्थित असलेल्या कुटुंबातील सदस्यांची संख्या, त्यांची दैनंदिन दिनचर्या आणि मौल्यवान वस्तू कुठे आहेत याची माहिती आधीच दिली होती. कोणीही पोलिसांना माहिती देऊ नये म्हणून आरोपींनी कुटुंबातील सदस्यांना एका खोलीत बंद केले. बनावट अधिकारी घर लुटत राहिले. दरम्यान, पीडितेच्या नातवाला संशय आला आणि त्याने त्यांची चौकशी सुरू केली. यानंतर, तिन्ही आरोपी ३-४ लाख रुपये रोख आणि ७ आलिशान घड्याळे घेऊन घटनास्थळावरून पळून गेले.
आरोपींना कसे पकडले?
एसीपी रवि शंकर आणि एसएचओ राजेंद्र जैन यांच्या नेतृत्वाखालील पथकाने हे हाय-प्रोफाइल प्रकरण सोडवले. पोलिसांनी परिसरातील सुमारे ३५० सीसीटीव्ही कॅमेरे स्कॅन केले आणि सराय काले खान ते गाजीपूर सीमेपर्यंतचे फुटेज एकत्र केले. सीसीटीव्ही ट्रेलचा पाठलाग करून, पोलिस गाझियाबादमधील वैशाली सेक्टर ४ येथे पोहोचले, जिथे आरोपीची कार पार्क केलेली आढळली. याव्यतिरिक्त, पोलिसांनी मोबाईल टॉवर डंप डेटा आणि IMEI ट्रॅकिंगचा वापर केला. यावरून असे दिसून आले की गुन्ह्याच्या ठिकाणी आणि वैशाली सेक्टर येथे काही विशिष्ट मोबाइल नंबर सक्रिय होते. या डेटाच्या आधारे, पोलिस पूजा राजपूतच्या घरी पोहोचले. स्थानिक गुप्तचर यंत्रणेने उघड केले की सबरवालची मोलकरीण रेखा देवी वारंवार या पत्त्यावर येत असे.
२५ फेब्रुवारी रोजी पोलिसांनी पूजाच्या घरावर छापा टाकला तेव्हा त्यांना चोरीचे सामान आणि गुन्ह्यात वापरलेले इतर सामान सापडले. त्यांनी आयटीबीपीच्या डेप्युटी कमांडंटचा गणवेश, वायरलेस सेट बॉक्स आणि बनावट ओळखपत्रे जप्त केली. तसेच घरातून चोरीला गेलेले सात आलिशान घड्याळे आणि दागिनेही सापडले.
हे ही वाचा:
‘द केरळ स्टोरी २’ च्या प्रदर्शनाला स्थगिती! कारण काय?
इंस्टाग्रामवर मोदी जगात नंबर वन, १० कोटी फॉलोअर्स
न्यायालयीन भ्रष्टाचारावर धडा असलेली सर्व पुस्तके मागे घ्या!
या कटात सहभागी असलेल्या दोन महिलांना पोलिसांनी अटक केली आहे, ज्यात सूत्रधार मोलकरीण रेखा देवी आणि तिची मेहुणी पूजा राजपूत यांचा समावेश आहे. इतर तीन संशयित अद्याप फरार आहेत. प्रकाश, मनीष आणि उपदेश सिंग थापा अशी फरार संशयितांची ओळख पोलिसांनी पटवली आहे. गुन्ह्यात वापरलेली बलेनो कार उपदेशच्या नावावर नोंदणीकृत आहे. या प्रकरणात, पोलिसांनी भादंविच्या कलम ३१८, ३१९, ३२९ आणि ३-५ अंतर्गत गुन्हा दाखल केला आहे. हे कलम फसवणूक, बनावटगिरी, खंडणी आणि गुन्हेगारी कटाशी संबंधित आहेत.
