पाकिस्तानातील खैबर पख्तूनख्वा प्रांतात एका गुरुद्वारामध्ये सेवा करणाऱ्या वृद्ध शीख दाम्पत्याची अज्ञात हल्लेखोरांनी गोळ्या झाडून हत्या केल्याची घटना समोर आली होती. या घटनेमुळे पाकिस्तानातील धार्मिक अल्पसंख्याकांच्या सुरक्षेबाबत पुन्हा एकदा गंभीर प्रश्न उपस्थित झाले. यानंतर पोलिसांनी मुख्य संशयिताला अटक केली आहे.
खैबर पख्तुनख्वा प्रांतातील मर्दान जिल्ह्यातील बाबू मोहल्ला परिसरातील गुरुद्वारात ७० वर्षीय जगन्नाथ आणि त्यांची पत्नी अस्मा वंती यांची अज्ञात व्यक्तीने गोळ्या झाडून हत्या केली होती. हे दाम्पत्य गुरुद्वाराचे काळजीवाहक म्हणून कार्यरत होते आणि अनेक वर्षांपासून तेथे सेवा बजावत होते. घटनेच्या वेळी दोघेही गुरुद्वाराच्या परिसरात उपस्थित असताना त्यांच्यावर गोळीबार करण्यात आला. या हल्ल्यात दोघांचाही जागीच मृत्यू झाला. घटनेनंतर परिसरात खळबळ उडाली आणि मोठ्या प्रमाणावर पोलिस बंदोबस्त तैनात करण्यात आला.
हत्येच्या तीन दिवसांनंतर पोलिसांनी या प्रकरणातील मुख्य संशयिताला अटक केली. अटक करण्यात आलेल्या व्यक्तीची ओळख शेर शाह अशी असून तो अमाझुगारी भागातील रहिवासी असल्याचे पोलिसांनी सांगितले. संशयिताला ताब्यात घेतल्यानंतर त्याची सखोल चौकशी सुरू करण्यात आली असून हत्येमागील कारणांचा शोध घेण्यासाठी तपास यंत्रणा विविध दिशांनी तपास करत आहे. या दुहेरी हत्येचा तपास करण्यासाठी संयुक्त तपास पथक (JIT) स्थापन करण्यात आले आहे. या पथकात स्थानिक पोलीस अधिकारी, दहशतवादविरोधी विभागाचे (CTD) अधिकारी आणि इतर वरिष्ठ तपास अधिकारी सहभागी आहेत.
मर्दानचे जिल्हा पोलीस अधिकारी (DPO) मसूद अहमद बंगश यांनी सांगितले की, आतापर्यंतच्या तपासात संशयिताचा कोणत्याही दहशतवादी संघटनेशी, प्रतिबंधित गटाशी किंवा संघटित गुन्हेगारी नेटवर्कशी संबंध असल्याचा कोणताही पुरावा आढळलेला नाही. सुरुवातीला या घटनेकडे दहशतवादी हल्ल्याच्या दृष्टीने पाहिले जात होते. मात्र तपासादरम्यान तशी कोणतीही ठोस माहिती समोर आलेली नाही. त्यामुळे पोलिस आता वैयक्तिक वाद, आर्थिक व्यवहार, स्थानिक मतभेद किंवा इतर संभाव्य कारणांचाही तपास करत आहेत. अधिकाऱ्यांच्या मते, संशयिताचे जबाब, घटनास्थळावरील पुरावे आणि साक्षीदारांच्या माहितीच्या आधारे तपास पुढे नेला जात आहे.
हे ही वाचा:
लैंगिक शोषणाच्या आरोपानंतर स्वयंघोषित आध्यात्मिक गुरू राधामोहन मिश्राला अटक
मान्सूनची वाटचाल ठप्प! एल निनोच नव्हे, ‘हे’ घटकही रोखतायत पावसाचा मार्ग
“प्रत्येक संकटावर लष्करी कारवाई हाच उपाय नसतो”
पश्चिम बंगालमध्ये CBIची मोठी कारवाई
या घटनेनंतर पाकिस्तानातील अल्पसंख्याक शीख समुदायात चिंता व्यक्त करण्यात येत आहे. धार्मिक स्थळातच सेवा करणाऱ्या वृद्ध दाम्पत्याची हत्या झाल्याने सुरक्षेचा प्रश्न पुन्हा ऐरणीवर आला आहे. स्थानिक शीख नेत्यांनी घटनेचा निषेध करत दोषींना कठोर शिक्षा देण्याची मागणी केली आहे. तसेच धार्मिक स्थळांच्या सुरक्षेसाठी अधिक प्रभावी उपाययोजना करण्याचे आवाहनही करण्यात आले आहे.