दक्षिण दिल्लीतील मालवीय नगर येथील हॉटेलमध्ये लागलेल्या आगीत २२ जण दगावले. यानंतर खळबळ उडालेली असतानाच धक्कादायक माहिती समोर आली आहे. प्राथमिक चौकशीत असे आढळून आले आहे की, ‘लेमन ग्रीन’ रेस्टॉरंट या हॉटेलमध्ये आग लागली होती, त्याला दिल्ली सरकारच्या ‘बेड अँड ब्रेकफास्ट’ (बी अँड बी) योजनेअंतर्गत केवळ सहा खोल्या चालवण्याची परवानगी होती. मात्र, प्रत्यक्षात तेथे तब्बल २५ खोल्यांचे संचालन केले जात असल्याचा आरोप आहे.
मिळालेल्या माहितीनुसार, संबंधित हॉटेल बी अँड बी योजनेअंतर्गत नोंदणीकृत होते. या योजनेच्या नियमांनुसार कोणत्याही नोंदणीकृत आस्थापनाला जास्तीत जास्त आठ खोल्या आणि १६ बेड चालवण्याची परवानगी असते. अशा परिस्थितीत २५ खोल्यांचे संचालन केल्याच्या आरोपामुळे हॉटेलची वैधता, नियामक नियमांचे पालन आणि सुरक्षा व्यवस्थेबाबत गंभीर प्रश्न उपस्थित झाले आहेत.
घटनेनंतर सुरुवातीच्या अहवालांमध्ये या आस्थापनाची ओळख “लेमन ग्रीन” अशी करण्यात आली होती. मात्र, नंतर दिल्ली सरकारने स्पष्ट केले की आग लागलेली इमारत प्रत्यक्षात मालवीय नगरच्या हौज रानी परिसरातील “फ्लोरिश स्टे” नावाचे हॉटेल आहे. या प्रकरणावर प्रतिक्रिया देताना स्थानिक आमदार सतीश उपाध्याय यांनी कथित अनियमिततेची पुष्टी केली नसली तरी संपूर्ण प्रकरणाची सखोल चौकशी केली जाईल आणि समोर येणाऱ्या तथ्यांच्या आधारे कारवाई करण्यात येईल, असे सांगितले.
दिल्ली पोलिसांनीही हॉटेल मालकाविरोधात चौकशी सुरू असल्याची पुष्टी केली आहे. अधिकाऱ्यांच्या म्हणण्यानुसार, ही चौकशी केवळ आग लागण्याच्या कारणांपुरती मर्यादित राहणार नाही, तर हॉटेल चालवताना सुरक्षा आणि परवाना नियमांचे पालन करण्यात आले होते की नाही, याचाही तपास केला जाणार आहे.
बुधवारी सकाळी ८.४८ वाजता आग लागल्याची माहिती मिळाली होती. हे हॉटेल साकेतमधील मॅक्स रुग्णालयाजवळील गजबजलेल्या परिसरात स्थित आहे. आग लागल्यानंतर परिसरात एकच गोंधळ उडाला आणि अनेक लोक इमारतीत अडकून पडले. अग्निशमन विभागाने तातडीने आठ अग्निशमन गाड्या घटनास्थळी पाठवल्या. अग्निशमन दल आणि बचाव पथकांनी धुराने भरलेल्या इमारतीत प्रवेश करून मोठ्या प्रमाणावर बचावकार्य राबवले. या मोहिमेदरम्यान ४० हून अधिक लोकांना सुरक्षित बाहेर काढण्यात आले.
हे ही वाचा:
दिल्लीतील मालवीय नगरमधील रेस्टॉरंटला आग; २२ जणांचा मृत्यू
परकीय चलन साठा वाचवण्यासाठी सोन्याची विक्री? सत्य काय?
अमेरिकेचा भारतासह ६० देशांवर नव्या शुल्काचा प्रस्ताव
वाळवीने पैसे खाल्ले! १ कोटींच्या नोटा फस्त
आग लागण्याचे नेमके कारण अद्याप स्पष्ट झालेले नाही. मात्र, प्रत्यक्षदर्शींनी शॉर्ट सर्किटमुळे ही दुर्घटना घडली असावी, अशी शक्यता व्यक्त केली आहे. तथापि, तांत्रिक तपास पूर्ण झाल्यानंतरच आगीच्या खऱ्या कारणाबाबत अधिकृत माहिती दिली जाईल, असे अधिकाऱ्यांनी सांगितले. या दुर्घटनेदरम्यान जीव वाचवण्यासाठी दोन महिलांनी इमारतीवरून उडी मारल्याचेही दिसून आले. आग आणि दाट धुरापासून बचाव करण्यासाठी त्यांनी हा निर्णय घेतल्याचे सांगितले जात आहे. अनेक जखमींना साकेत येथील मॅक्स रुग्णालय आणि एम्स ट्रॉमा सेंटरमध्ये दाखल करण्यात आले आहे.