लाल किल्ला बॉम्बस्फोटातील संशयित, फरीदाबाद मॉड्यूलच्या डॉ. उमरचा फोटो आला समोर

सोमवारी रात्री लाल किल्ल्याजवळ झालेल्या स्फोटात १० जणांचा मृत्यू झाला तर अनेक जण जखमी झाले. ज्या गाडीमध्ये हा स्फोट झाला त्यावेळी फरिदाबाद दहशतवादी मॉड्यूलचा संशयित दहशतवादी मोहम्मद उमर हा गाडी चालवत असल्याची माहिती समोर आली आहे. उमर हा फरिदाबादमधील अल फलाह मेडिकल कॉलेजमध्ये डॉक्टर म्हणून नोकरी करत होता. उमर हा अनंतनागमधील सरकारी वैद्यकीय महाविद्यालय (जीएमसी) येथील माजी वरिष्ठ निवासी डॉक्टर आदिल अहमद राथेरचा जवळचा सहकारी असल्याचे सांगितले जात आहे. सबंधित घटनेनंतर उमरच्या आई आणि भावांना चौकशीसाठी ताब्यात घेण्यात आले आहे.

इंडिया टुडेने सूत्रांच्या हवाल्याने वृत्त दिले आहे की, उमर गाडीमध्ये होता आणि त्याने त्याच्या दोन साथीदारांसह हल्ला करण्याची योजना आखली असावी. सोमवारी फरीदाबादमध्ये अटक झाल्यानंतर दहशतीच्या वातावरणात हा हल्ला करण्यात आला. उमरने त्याच्या साथीदारांसह कारमध्ये डिटोनेटर बसवले आणि दहशतवादी कृत्य केले. संध्याकाळच्या गर्दीच्या वेळी, पर्यटन स्थळ असलेल्या या भागात गर्दी असताना, उच्च-तीव्रतेच्या स्फोटात अमोनियम नायट्रेट इंधन तेलाचा वापर करण्यात आल्याची पुष्टी तपासकर्त्यांनी केली आहे.

माहितीनुसार, सोमवारी संध्याकाळी ६.५२ वाजता स्फोट होण्यापूर्वीचे गाडीचे सीसीटीव्ही फुटेज घेण्यात आले आहे. लाल किल्ल्याजवळील सुनेहरी मशिदीजवळ गाडी जवळजवळ तीन तास उभी होती . सीसीटीव्ही फुटेजमध्ये कार दुपारी ३.१९ वाजता पार्किंगमध्ये प्रवेश करताना आणि संध्याकाळी ६.४८ वाजता निघताना दिसत होती, त्यानंतर काही वेळातच स्फोट झाला. सुरुवातीला, चालकाचा चेहरा स्पष्ट दिसतो, परंतु गाडी पुढे सरकत असताना, चाकाच्या मागे एक मुखवटा घातलेला माणूस दिसतो. ही गाडी शेवटची बदरपूर सीमेवरून शहरात प्रवेश करताना दिसली होती. तिच्या उर्वरित मार्गाची अद्याप चौकशी सुरू आहे. या घटनेसंदर्भात दिल्ली पोलिस सध्या किमान १३ संशयितांची चौकशी करत आहेत.

हेही वाचा..

सहा दशकं सिनेसृष्टीवर अधिराज्य गाजवलेले बॉलिवूडचे ‘ही-मॅन’ काळाच्या पडद्याआड

लाल किल्ला स्फोट : सीसीटीव्ही फुटेजमधून मिळाली महत्त्वाची माहिती

बिहार निवडणूक २०२५: शेवटच्या टप्प्यात २० जिल्ह्यांमधील १२२ जागांसाठी मतदान!

भारत–दक्षिण आफ्रिका टेस्ट इतिहासातील फक्त चार डाव, ज्यात झाले ६०० पेक्षा अधिक धावा!

स्फोट घडवून आणण्यासाठी वापरण्यात आलेली ह्युंदाई आय२० ही गाडी मूळची मोहम्मद सलमानची होती, ज्याला सोमवारी रात्री अटक करण्यात आली. नंतर ती अनेक वेळा बदलली गेली. प्रथम नदीमला विकली गेली आणि नंतर फरीदाबाद सेक्टर ३७ मधील रॉयल कार झोन या जुन्या कार डीलरला विकली गेली. त्यानंतर, ही गाडी आमिरने, नंतर तारिकने, जो फरिदाबाद दहशतवादी मॉड्यूलचा सदस्य असल्याचे मानले जाते आणि नंतर मोहम्मद उमरने खरेदी केली.