दिल्लीत अंमलबजावणी संचालनालयाने (ईडी) एका बाईक टॅक्सी चालकाच्या बँक खात्यात ३३१ कोटी रुपये जमा केल्याचा मनी लॉड्रिंगचा खटला उघडकीस आणला आहे. ही रक्कम अवघ्या आठ महिन्यांत जमा करण्यात आली. ईडीने ड्रायव्हरच्या घरावर छापा देखील टाकला आहे.
अहवालांनुसार, ईडी बेकायदेशीर ऑनलाइन बेटिंग ऍप “वनएक्सबेट”शी संबंधित मनी लाँड्रिंग प्रकरणाची चौकशी करत आहे. दरम्यान, आठ महिन्यांत एकाच बँक खात्यात जमा झालेल्या ३३१ कोटींहून अधिक रकमेच्या पैशांची चौकशी करणारे अधिकारी दिल्लीच्या एका सामान्य भागात दोन खोल्यांच्या झोपडपट्टीत राहणाऱ्या एका बाईक टॅक्सी चालकाच्या दाराशी पोहोचले.
अधिकाऱ्यांनी सांगितले की त्यांना १९ ऑगस्ट २०२४ ते १६ एप्रिल २०२५ दरम्यान बाईक टॅक्सी चालकाच्या बँक खात्यात ३३१.३६ कोटी रुपये (अंदाजे $३.३१ अब्ज) जमा झाल्याचे आढळून आले. आठ महिन्यांपेक्षा कमी कालावधीत लाखो रुपयांचे संशयास्पद व्यवहार लक्षात घेऊन, एजन्सीने चालकाच्या बँक रेकॉर्डमध्ये असलेल्या पत्त्यावर छापा टाकला. तपासात असे दिसून आले की, चालक दिल्लीच्या एका सामान्य भागात दोन खोल्यांच्या झोपडपट्टीत राहत होता आणि उदरनिर्वाहासाठी बाईक टॅक्सी चालवत होता.
ईडीच्या लक्षात आले की ३३१ कोटी रुपयांपेक्षा जास्त रकमेपैकी १ कोटी रुपयांपेक्षा जास्त रक्कम राजस्थानच्या लेक सिटी उदयपूरमधील एका आलिशान हॉटेलमध्ये झालेल्या ‘ग्रँड डेस्टिनेशन वेडिंग’वर खर्च करण्यात आली. अधिकाऱ्यांच्या मते, हे लग्न गुजरातमधील एका तरुण नेत्याशी जोडलेले आहे, ज्याला लवकरच चौकशीसाठी बोलावले जाऊ शकते.
बाईक टॅक्सी चालकाने चौकशीदरम्यान ईडी तपासकर्त्यांना सांगितले की त्याला बँक व्यवहारांची कोणतीही माहिती नाही, तसेच तो वधू-वर किंवा त्यांच्या कुटुंबियांना ओळखत नाही, ज्यांचे लग्न उदयपूरमध्ये त्याच्या खात्यात जमा केलेल्या पैशांचा वापर करून झाले होते. ईडीला संशय आहे की डायव्हरचे बँक खाते हे एक व्यवहारासाठीचे प्लॅटफॉर्म होते.
हेही वाचा..
जीडीपीचा दर ८.२ टक्के वेगाने वाढणे हे विकासकेंद्रित धोरणांच्या प्रभावाचे द्योतक
राबडीदेवी केस : न्यायालयाने सीबीआय, ईडीला बजावली नोटीस
अल- फलाह संस्थापकाचा जमीन घोटाळा; मृतांना दाखवले जमिनीचे मालक
ईडीला असे आढळून आले की अनेक अज्ञात स्रोतांमधून खात्यात मोठ्या प्रमाणात पैसे जमा केले गेले आणि ते जलदगतीने इतर संशयास्पद खात्यांमध्ये हस्तांतरित केले गेले. अधिकाऱ्यांनी सांगितले की या बँक खात्यात हस्तांतरित केलेल्या निधीचा एक स्रोत बेकायदेशीर जुगाराशी जोडलेला होता. ऍप “वनएक्सबेट” चौकशीचा भाग म्हणून एजन्सीने अलीकडेच माजी क्रिकेटपटू शिखर धवन आणि सुरेश रैना यांच्या कोट्यवधी रुपयांच्या मालमत्तेवर जप्ती आणली आहे, तसेच इतर अनेक क्रिकेटपटू आणि सेलिब्रिटींची चौकशी केली आहे.
