जम्मू-काश्मीरच्या उधमपूरमध्ये दोन दहशतवाद्यांचा खात्मा

- Advertisement -

जम्मू-काश्मीरच्या उधमपूर जिल्ह्यात सुरक्षा दलांना मोठे यश मिळाले असून दोन दहशतवाद्यांचा खात्मा केला आहे. बुधवारी रात्री उशिरा झालेल्या चकमकीत दोन दहशतवादी ठार झाले आहेत. हे दहशतवादी पाकिस्तानस्थित जैश-ए-मोहम्मद (JeM) या दहशतवादी संघटनेशी संबंधित असल्याचा सुरक्षा यंत्रणांचा प्राथमिक अंदाज आहे. मात्र, ठार झालेल्या दहशतवाद्यांची ओळख अद्याप निश्चित झालेली नाही.

उधमपूरच्या सोहन परिसरात काही संशयित व्यक्तींची हालचाल होत असल्याची माहिती सुरक्षा दलांना मिळाली होती. या गुप्त माहितीनंतर परिसरात मोठ्या प्रमाणावर घेराव घालून शोधमोहीम सुरू करण्यात आली. शोधमोहीम सुरू असतानाच सुरक्षा दलांचा संशयित दहशतवाद्यांशी संपर्क झाला आणि त्यानंतर दोन्ही बाजूंमध्ये जोरदार गोळीबार झाला. रात्री सुरू झालेली ही कारवाई पहाटेपर्यंत सुरू होती. त्यानंतर सुरक्षा दलांना घटनास्थळी दोन संशयित दहशतवाद्यांचे मृतदेह आढळून आले. हे दोघेही परदेशी नागरिक असण्याची शक्यता व्यक्त करण्यात आली आहे. घटनास्थळावरून शस्त्रास्त्रे आणि मोठ्या प्रमाणात दारूगोळाही जप्त करण्यात आला आहे.

हे ही वाचा:

‘सेबी’च्या पूर्णवेळ सदस्यपदी कमलेश चंद्र वार्ष्णेय यांची पुनर्नियुक्ती

दिशा सालियनला मी कधी भेटलोच नाही!

यूएईकडून ५ हजार बांगलादेशी नागरिकांचा व्हिसा रद्द

शहापूरजवळ कार-ट्रकच्या धडकेत दोन चिमुकल्यांसह चौघांचा मृत्यू

या संयुक्त कारवाईत राष्ट्रीय रायफल्स, पॅरा स्पेशल फोर्सेस आणि जम्मू-काश्मीर पोलिसांचा सहभाग होता. दहशतवाद्यांची ओळख, त्यांचे नेटवर्क आणि परिसरात त्यांच्या हालचालींबाबत पुढील तपास सुरू आहे. उधमपूरमधील ही कारवाई अशा वेळी झाली आहे, जेव्हा जम्मू-काश्मीरमध्ये दहशतवाद्यांच्या हालचालींविरोधात सुरक्षा दलांकडून शोध आणि क्षेत्र वर्चस्व मोहिमा वाढवण्यात आल्या आहेत. काही दिवसांपूर्वी, ५ सप्टेंबर रोजी मध्य काश्मीरमधील बडगाम जिल्ह्यात सुरक्षा दलांच्या कारवाईत पाकिस्तानस्थित लष्कर-ए-तैयबाचा कमांडर यासिर ठार झाला होता.