आंतरराज्य वन्यजीव तस्करीविरुद्धच्या एका मोठ्या कारवाईत, सीबीआय आणि डीआरआयने ‘वाईल्डलाईफ क्राईम कंट्रोल ब्युरो’च्या (WCCB) मदतीने महाराष्ट्र आणि पश्चिम बंगाल दरम्यान कार्यरत असलेल्या वन्यजीव तस्करीच्या आंतरराज्य टोळीचा पर्दाफाश केला आहे.
अधिकाऱ्यांनी दिलेल्या माहितीनुसार, ही टोळी महाराष्ट्र आणि पश्चिम बंगाल दरम्यान कार्यरत होती. मुंबई व कोलकाता येथून ५३ अत्यंत संरक्षित व दुर्मिळ वन्यजीव (प्राणी, पक्षी आणि सरपटणारे प्राणी) यांची सुटका करण्यात आली. या ५३ अत्यंत संरक्षित प्रजातींमध्ये १५ ‘स्लो लोरिस’, दोन ‘बिंटुरॉन्ग’, २८ ‘स्टार कासव’ (Star Tortoises), सहा ‘इजिप्शियन गिधाडे’ (Egyptian Vultures) आणि दोन ‘शिकरा’ (Shikra) पक्ष्यांचा समावेश आहे. या नमूद केलेल्या सर्व प्रजाती ‘वन्यजीव संरक्षण कायदा, १९७२’ च्या ‘अनुसूची-१’ (Schedule I) अंतर्गत संरक्षित आहेत, या कायद्याद्वारे या प्राण्यांना सर्वोच्च पातळीचे संरक्षण दिले जाते.
जप्त केलेले प्राणी वनविभागाकडे सोपवले
वन्यजीवांची शिकार, अवैध पकड आणि तस्करीमध्ये कथितरीत्या गुंतलेल्या आंतरराज्य नेटवर्कबाबत DRI मुंबईला मिळालेल्या विशिष्ट गुप्त माहितीच्या आधारे महाराष्ट्र आणि पश्चिम बंगालमध्ये ही संयुक्त मोहीम राबवण्यात आली. CBI ने मंगळवारी आणि बुधवारी ‘वन्यजीव संरक्षण कायदा, १९७२’ आणि ‘भारतीय न्याय संहिता, २०२३’ च्या तरतुदींनुसार दोन स्वतंत्र गुन्हे (FIR) दाखल केले आहेत. जप्त केलेले प्राणी दोन्ही राज्यांच्या संबंधित वनविभागांकडे सोपवण्यात आले आहेत.
हे ही वाचा:
व्हेनेझुएलामधील भूकंपातील मृतांचा आकडा ३,८८९ वर
देशभरात मान्सूनचा कहर; १० जणांचा मृत्यू
निदा खानला जामीन देताना श्रीकृष्णाचा उल्लेख, पण गुन्हा गंभीरच
ट्रम्प यांच्या हत्येचा कट? इस्रायलने अमेरिकेला दिला गुप्तचर अहवाल
या मोहिमेनंतर, मुंबई वनविभागाने ३७ प्राणी, पक्षी आणि सरपटणाऱ्या प्राण्यांचा ताबा ‘रेस्क्यूइंक असोसिएशन फॉर वाईल्डलाईफ वेल्फेअर’ (RAWW) या शहरातील वन्यजीव बचाव आणि पुनर्वसन तज्ज्ञ पथकाकडे सोपवला आहे. तज्ज्ञांचे हे पथक सध्या सुटका केलेल्या वन्यजीवांवर उपचार करत असून त्यांची काळजी घेत आहे. पुढील पुनर्वसन आणि नैसर्गिक अधिवासात सोडण्याच्या प्रक्रियेसाठी या प्राण्यांना त्यांच्या मूळ राज्यांमध्ये परत पाठवण्याबाबत वनविभाग काम करत आहे.