मध्य फिलीपिन्समध्ये भूकंपाचा धक्का बसला असून मोठ्या प्रमाणात जीवितहानी झाली आहे. ६.९ रिश्टर स्केलच्या या भूकंपात मृतांचा आकडा ६९ वर पोहोचला असून १४० हून अधिक लोक जखमी झाले आहेत. बचाव पथके कोसळलेल्या इमारतींपर्यंत पोहोचत असताना मृतांची संख्या वाढू शकते, अशी भीती व्यक्त केली जात आहे.
युनायटेड स्टेट्स जिओलॉजिकल सर्व्हेने (USGS) सांगितले की भूकंपाचे केंद्र बोगोच्या ईशान्येस सुमारे १७ किलोमीटर (१० मैल) अंतरावर होते. हे सुमारे ९०,००० लोकसंख्या असलेले किनारी शहर आहे. स्थानिक फॉल्ट लाइनमुळे भूकंप झाला आणि त्यामुळे शहरे आणि गावांमध्ये मोठ्या प्रमाणात नुकसान झाले. सर्वात जास्त नुकसान झालेल्या भागांपैकी एक असलेल्या बोगोमध्ये १४ जणांचा मृत्यू झाल्याची नोंद आहे, परंतु अधिकाऱ्यांनी इशारा दिला आहे की बचाव कार्य सुरू असल्याने मृतांचा आकडा वाढू शकतो. एका डोंगराळ गावात झालेल्या भूस्खलनामुळे झोपड्यांचा समूह गाडला गेला, ज्यामुळे बचाव कार्यात अडथला निर्माण होत आहे.
सॅन रेमिजिओ शहरात सहा जणांचा मृत्यू झाल्याची पुष्टी झाली आहे असून यात तीन तटरक्षक दलाचे कर्मचारी, एक अग्निशमन दलाचा जवान आणि एक मूल यांचा समावेश आहे, असे उपमहापौर अल्फी रेयन्स यांनी सांगितले. पाणी व्यवस्था खराब झाली असून रहिवाशांसाठी अन्न आणि स्वच्छ पाण्याची गरज असल्याचे त्यांनी म्हटले.
बोगोमधील प्रत्यक्षदर्शींनी सांगितले की, तीव्र हादऱ्यांमुळे भिंती, घरे आणि रस्ते यांना भेगा पडल्या आणि त्यांचे नुकसान झाले. शेकडो रहिवासी घाबरले असून आता त्यांनी त्यांच्या घरी जाण्यास नकार देत एका मोकळ्या मैदानात आश्रय घेतला आहे. दानबंतायनमधील अनेक व्यावसायिक प्रतिष्ठानांचे, रस्त्यांचे आणि एका ऐतिहासिक रोमन कॅथोलिक चर्चचे नुकसान झाल्याची माहिती आहे.
हे ही वाचा:
लोकशाही वाचवण्यासाठी राहुल गांधी दक्षिण अमेरिकेत दाखल
बरेलीमध्ये मौलाना मोहसीन रझा यांच्या मालमत्तेवर बुलडोझर कारवाई!
पुरुषांमध्ये मधुमेह ओळखण्यास उशीर लागतो
तेल टँकर मधून गोतस्करी, २० गायींची सुटका, चालक फरार!
भूकंपानंतर फिलीपिन्स इन्स्टिट्यूट ऑफ व्होल्केनॉलॉजी अँड सिस्मोलॉजीने सुरुवातीला त्सुनामीचा इशारा जारी केला होता, ज्यामध्ये सेबू, लेयटे आणि बिलिरनमधील किनारपट्टीवरील रहिवाशांना १ मीटर (३ फूट) उंचीच्या लाटांच्या धोक्यामुळे आत जाण्याचा सल्ला देण्यात आला होता. संस्थेचे संचालक टेरेसिटो बाकोलकोल यांनी नंतर पुष्टी केली की इशारा मागे घेण्यात आला आहे, कोणत्याही असामान्य लाटांच्या हालचाली आढळल्या नाहीत.
