“आसिम मुनीर आणि मी जगभर पैसे मागण्यासाठी जातो, तेव्हा लाज वाटते”

पाकिस्तानचे पंतप्रधान शहबाज शरीफ यांनी देशाच्या ढासळलेल्या आर्थिक परिस्थितीबाबत स्पष्ट विधान करत, स्वतःला आणि पाकिस्तानी लष्करप्रमुख फील्ड मार्शल आसिम मुनीर यांना परदेशात जाऊन आर्थिक मदतीची याचना करावी लागत असल्याचे मान्य केले आहे. ही प्रक्रिया अपमानास्पद असून त्यामुळे देशाच्या आत्मसन्मानाला तडा जात असल्याचे त्यांनी सांगितले. अनेक देश भारतासोबत व्यापार करार करत असताना आणि भारताच्या आर्थिक दिशेवर विश्वास व्यक्त करत असतानाच हे विधान समोर आले आहे.

इस्लामाबाद येथे पाकिस्तानमधील आघाडीच्या निर्यातदारांना संबोधित करताना शहबाज शरीफ म्हणाले की, पाकिस्तानच्या परकीय चलन साठ्यात झालेली अलीकडील वाढ ही अर्थव्यवस्थेच्या नैसर्गिक मजबुतीमुळे नसून कर्जाच्या पैशांमुळे आहे. “परकीय चलन साठा जवळपास दुप्पट झाला आहे, पण त्यात आपल्या मित्र देशांकडून घेतलेली कर्जे आहेत. जो कर्ज मागायला जातो, त्याची मान खाली असते,” असे ते म्हणाले.

पंतप्रधानांनी पुढे सांगितले की, आंतरराष्ट्रीय पातळीवर कर्ज मागणे हे वैयक्तिक आणि राष्ट्रीय पातळीवर लज्जास्पद ठरत आहे. “फील्ड मार्शल आसिम मुनीर आणि मी जगभर पैसे मागण्यासाठी जातो, तेव्हा आम्हाला लाज वाटते. कर्ज घेणे हे आपल्या आत्मसन्मानावर मोठे ओझे आहे. आमच्या माना लाजेने खाली झुकतात. अनेकदा आमच्यावर लादल्या जाणाऱ्या अटी आम्हाला नाकारताही येत नाहीत,” असे त्यांनी स्पष्ट केले.

पाकिस्तानी पंतप्रधानांचे हे वक्तव्य आंतरराष्ट्रीय नाणेनिधी (IMF) सोबत सुरू असलेल्या चर्चांच्या पार्श्वभूमीवर आले आहे. पाकिस्तानला अलीकडेच IMF कडून १.२ अब्ज डॉलर्सची मदत मिळाली असून त्यात हवामानाशी संबंधित वित्तपुरवठ्याचाही समावेश आहे. मात्र, या मदतीच्या बदल्यात कठोर धोरण, सरकारी खर्चावर मर्यादा आणि संरचनात्मक सुधारणांच्या अटी लागू करण्यात आल्या आहेत. याच आठवड्यात पाकिस्तानच्या स्टेट बँकेने अनपेक्षितपणे धोरणात्मक व्याजदर १०.५ टक्क्यांवर स्थिर ठेवला. महागाई वाढण्याचा धोका कायम असल्याचे कारण देण्यात आले. केंद्रीय बँकेने चालू आर्थिक वर्षासाठी ३.७५ ते ४.७५ टक्के GDP वाढीचा अंदाज व्यक्त केला असून डिसेंबरपर्यंत परकीय चलन साठा २० अब्ज डॉलर्सच्या पुढे जाण्याची शक्यता वर्तवली आहे, मात्र तो अद्याप बाह्य वित्तपुरवठ्यावर अवलंबून आहे.

हे ही वाचा:

सुनेत्रा अजित पवार महाराष्ट्राच्या नव्या उपमुख्यमंत्री

पूर्व कांगोतील कोल्टन खाण कोसळली

‘GaN’ लष्करी तंत्रज्ञानात डीआरडीओचा ब्रेकथ्रू,

पुढील पाच वर्षे जागतिक बँकेकडून भारताला मिळणार ८-१० अब्ज डॉलर

शहबाज शरीफ यांनी पाकिस्तान मित्रदेशांवर अवलंबून असल्याची कबुली दिली. त्यांनी चीनला ‘ऑल-वेदर फ्रेंड’ संबोधत सौदी अरेबिया, संयुक्त अरब अमिराती (UAE) आणि कतारचे आभार मानले. चीनने अब्जावधी डॉलर्सच्या ठेवींचे रोलओव्हर केले आहे. सऊदी अरेबियाने ३ अब्ज डॉलर्सची ठेव आणि तेल सुविधा दिली आहे, तर UAE ने २ अब्ज डॉलर्सचे कर्ज वाढवले आहे. कतारने ३ अब्ज डॉलर्सच्या गुंतवणुकीसह LNG पुरवठ्याशी संबंधित योजनांवर सहमती दर्शवली आहे. तरीही, पंतप्रधानांनी मान्य केले की पाकिस्तानच्या मूलभूत समस्या अद्याप तशाच आहेत. सार्वजनिक कर्ज ७६,००० अब्ज रुपयांच्या पुढे गेले आहे, गरीबी आणि बेरोजगारी उच्च पातळीवर आहेत आणि अर्थव्यवस्था सावरण्यासाठी देशाला अजूनही IMF आणि परकीय कर्जावर अवलंबून राहावे लागत आहे.