ढेपाळलेल्या अर्थव्यवस्थेमुळे त्रस्त असलेले पाकिस्तानी नागरिक आता आखातामधील तणावाचा थेट फटका सहन करत आहेत. मध्य- पूर्वेत सुरू असलेल्या युद्धामुळे जागतिक तेलाच्या किमती वाढल्या असून त्याचा थेट परिणाम पाकिस्तानवर झाला आहे. पाकिस्तानी सरकारने एका महिन्यात दुसऱ्यांदा पेट्रोल आणि डिझेलच्या किमतींमध्ये मोठी वाढ केली आहे, ज्यामुळे महागाई आणि आर्थिक ताण आणखी वाढण्याची शक्यता आहे.
नव्या दरांनुसार, डिझेलच्या किमतीत ५४.९% वाढ करून ती ५२०.३५ पाकिस्तानी रुपये प्रति लिटर करण्यात आली आहे, तर पेट्रोल ४२.७% महाग होऊन ४५८.५० रुपये प्रति लिटर झाले आहे. हे नवे दर शुक्रवारपासून लागू होतील. पेट्रोलियम मंत्री अली परवेज मलिक यांनी हा निर्णय अपरिहार्य असल्याचे सांगत म्हटले, “अमेरिका-इराण युद्धानंतर आंतरराष्ट्रीय बाजारातील किमती नियंत्रणाबाहेर गेल्या आहेत, त्यामुळे दरवाढ करणे आवश्यक होते.” यावेळी त्यांच्यासोबत अर्थमंत्री मुहम्मद औरंगजेबही उपस्थित होते.
लक्षात घेण्यासारखी बाब म्हणजे, गेल्या महिन्यातही पाकिस्तान सरकारने पेट्रोल आणि डिझेलच्या किमतींमध्ये सुमारे 20% वाढ केली होती. त्यावेळीही अमेरिका-इस्रायलच्या इराणविरोधी कारवाईमुळे जागतिक किमती वाढल्याचे कारण देण्यात आले होते. सलग दुसऱ्यांदा झालेल्या या मोठ्या दरवाढीमुळे सामान्य नागरिकांच्या अडचणी अधिकच वाढल्या आहेत. पाकिस्तान आपल्या ऊर्जेच्या गरजांसाठी मोठ्या प्रमाणावर आयातीवर अवलंबून आहे. विशेषतः सौदी अरेबिया आणि संयुक्त अरब अमिरातीकडून तेल आयात केले जाते, जे होर्मुझ सामुद्रधुनीमार्गे येते. त्यामुळे आंतरराष्ट्रीय तणावाचा थेट परिणाम देशांतर्गत किमतींवर होत आहे.
पाकिस्तानी अर्थमंत्री औरंगजेब यांनी वाढत्या किमतींचा परिणाम कमी करण्यासाठी काही दिलासादायक उपाय जाहीर केले आहेत. सरकार दुचाकी वाहनधारकांना तीन महिन्यांसाठी प्रति लिटर १०० रुपयांची सबसिडी देणार असून, त्याची मर्यादा दरमहा २० लिटर इतकी असेल. पेट्रोलियम मंत्री मलिक यांनी सांगितले की, गेल्या तीन आठवड्यांत सरकारने १२९ अब्ज रुपयांची सबसिडी दिली आहे, मात्र ती पुढे सुरू ठेवणे शक्य नाही. मर्यादित संसाधने आणि युद्धाचा अंत दिसत नसल्यामुळे व्यापक सबसिडी कायम ठेवणे कठीण झाले आहे.
हे ही वाचा:
अमेरिकन आर्मी चीफ यांना राजीनामा देण्याचे निर्देश! कारण काय?
“संघर्षाच्या निराकरणासाठी मुत्सद्देगिरी, संवादाचा मार्ग व्यवहार्य”
मुंबईसह राज्याला अवकाळी पावसाचा इशारा; शेतकऱ्यांना सतर्कतेचा इशारा
भारत डिजिटल व्यवहारांत आघाडीवर; मार्चमध्ये UPI व्यवहारांचा विक्रमी उच्चांक
जागतिक तेल बाजारात मोठी अस्थिरता कायम आहे. डोनाल्ड ट्रम्प यांनी युद्ध कारवाई तीव्र करण्याचे संकेत दिल्यानंतर अमेरिकन कच्च्या तेलाच्या किमतीत ११% पेक्षा जास्त वाढ झाली, तर ब्रेंट क्रूड ७% पेक्षा अधिक वाढले आहे. ही परिस्थिती कायम राहिली तर पाकिस्तानमधील महागाई आणखी वाढेल आणि आधीच आर्थिक संकटाचा सामना करणाऱ्या जनतेवर अधिकच भार पडेल.
