हायजॅकचा सिग्नल; कॉकपिटमध्ये पायलटवर चाकूने हल्ला

दुबईहून तेल अवीवला जाणाऱ्या फ्लायदुबईच्या विमानात उड्डाणादरम्यान अचानक गोंधळ उडाला. कॉकपिटमध्ये झालेल्या कथित हाणामारीनंतर विमानाने आपत्कालीन संकेत पाठवला आणि नंतर सौदी अरेबियातील ताबुक विमानतळावर आपत्कालीन लँडिंग करण्यात आले. या घटनेनंतर विमानातील प्रवाशांनी कॉकपिटमध्ये रक्त आणि एका पायलटवर चाकूने हल्ला झाल्याचे सांगितले.

फ्लायदुबईचे एफझेड१०७३ हे विमान दुबईहून तेल अवीवच्या दिशेने जात होते. विमानात सुमारे १८० प्रवासी असल्याचे सांगण्यात आले आहे. उड्डाणादरम्यान विमानाने प्रथम ‘७७००’ हा आंतरराष्ट्रीय आपत्कालीन संकेत पाठवला. त्यानंतर काही काळ ‘७५००’ हा संकेत प्रसारित झाल्याचे फ्लाइट-ट्रॅकिंग डेटावरून समोर आले. ‘७५००’ हा संकेत विमान अपहरण किंवा बेकायदेशीर हस्तक्षेपाशी संबंधित असतो. त्यामुळे इस्रायली हवाई दलाची लढाऊ विमाने विमानाच्या दिशेने रवाना करण्यात आली.

दरम्यान, प्रवाशांच्या म्हणण्यानुसार विमानात अचानक किंचाळण्याचे आवाज ऐकू आले. त्यानंतर कॉकपिट उघडण्यात आले असता तेथे रक्त दिसले. एका प्रवाशाने इस्रायली माध्यमांना दिलेल्या माहितीनुसार, एका पायलटवर पॉकेट नाइफने हल्ला करण्यात आला होता. काही इस्रायली प्रवाशांनी क्रू सदस्यांच्या मदतीने हल्लेखोराला रोखण्याचा प्रयत्न केल्याचेही सांगण्यात आले. या घटनेमुळे विमानातील प्रवाशांमध्ये प्रचंड भीती निर्माण झाली.

एका अन्य प्रवाशाने सांगितले की, कॉकपिटमधील गोंधळानंतर विमान अचानक वेगाने खाली येऊ लागले. काही क्षण विमानावरील नियंत्रण सुटल्यासारखे वाटत होते आणि प्रवाशांना आपल्या जीवाची भीती वाटत होती. उपलब्ध फ्लाइट डेटानुसार, विमानाने काही वेळातच सुमारे ३४ हजार फूट उंचीवरून मोठी घसरण केली.

हे ही वाचा:

कांदिवलीच्या प्रियांका पारेखची पॉवरलिफ्टिंगमध्ये सुवर्ण कामगिरी

एअर इंडियाला १० हजार कोटींच्या कर्जाची गरज

इंडी आघाडीच्या बैठकीकडे आप, डीएमकेची पाठ

आरबीआयच्या हस्तक्षेपामुळे रुपयाची घसरण थांबली

घटनेच्या सुरुवातीला विमान अपहरण झाल्याची शक्यता व्यक्त करण्यात आली होती. मात्र, नंतरच्या प्राथमिक माहितीनुसार कॉकपिटमध्ये पायलट आणि सहपायलट यांच्यात झालेल्या कथित हाणामारीमुळे ही परिस्थिती निर्माण झाल्याचे सांगण्यात आले. इस्रायली अधिकाऱ्यांनीही विमानातील घटना सुरक्षेशी संबंधित नसल्याचे प्राथमिक पातळीवर म्हटले आहे. विमानाने अखेर सौदी अरेबियातील ताबुक विमानतळावर सुरक्षित लँडिंग केले. फ्लायदुबईनेही विमानात एक घटना घडल्याचे अधिकृतपणे मान्य केले असून, विमान सुरक्षितपणे ताबुक येथे उतरल्याचे आणि सर्व प्रवासी सुरक्षित असल्याचे सांगितले आहे.