इस्रायलचे पंतप्रधान बेंजामिन नेतान्याहू यांनी भारताचे कौतुक करत इस्रायलला भारतातून “प्रचंड पाठिंबा” मिळत असल्याचे म्हटले आहे. अमेरिकेचे उपराष्ट्राध्यक्ष जेडी व्हान्स यांनी “अमेरिकाच इस्रायलची एकमेव शक्तिशाली मित्रराष्ट्र आहे” असे वक्तव्य केल्यानंतर नेतान्याहू यांनी त्याला प्रत्युत्तर देताना भारताचा विशेष उल्लेख केला. अमेरिकेतील फॉक्स न्यूजला दिलेल्या मुलाखतीत नेतान्याहू म्हणाले, “जेडी व्हान्स यांचा मला आदर आहे आणि आमचे चांगले संबंध आहेत. मात्र, त्यांच्या प्रत्येक मताशी मी सहमत असेनच असे नाही.” त्यानंतर त्यांनी इस्रायलला केवळ अमेरिकेचाच पाठिंबा असल्याचा दावा फेटाळून लावत म्हटले, “आमचे इतरही अनेक मित्र आहेत. भारतासारखा एक देश आहे, ज्याची लोकसंख्या १.४ अब्ज आहे आणि तिथून आम्हाला प्रचंड पाठिंबा मिळतो.”
नेतान्याहू यांनी भारतातील लोकांकडून सोशल मीडियावर मिळणाऱ्या प्रतिसादाचाही उल्लेख केला. त्यांनी सांगितले की, फेसबुकसारख्या प्लॅटफॉर्मवर भारतातून मोठ्या प्रमाणावर इस्रायलच्या समर्थनार्थ प्रतिक्रिया मिळतात. त्यामुळे भारत हा इस्रायलच्या महत्त्वाच्या समर्थकांपैकी एक असल्याचे त्यांनी अधोरेखित केले.
भारत आणि इस्रायल यांच्यात गेल्या काही वर्षांत संरक्षण, तंत्रज्ञान, कृषी, सायबर सुरक्षा आणि व्यापार या क्षेत्रांमध्ये सहकार्य मोठ्या प्रमाणात वाढले आहे. पंतप्रधान नरेंद्र मोदी आणि बेंजामिन नेतान्याहू यांच्यातही घनिष्ठ वैयक्तिक संबंध असल्याचे अनेकदा दिसून आले आहे. यंदाच्या सुरुवातीला नेतान्याहू यांनी पंतप्रधान मोदी यांना “माझे मित्र” असे संबोधत भारताला जागतिक महासत्ता असेही म्हटले होते. फेब्रुवारी महिन्यात मोदी यांनी इस्रायल दौऱ्यात भारत इस्रायलसोबत ठामपणे उभा असल्याची भूमिका मांडली होती.
व्हान्स यांनी नेमके काय म्हटले होते?
अमेरिका आणि इराणमधील युद्धविराम करारावरून इस्रायल सरकारमधील काही घटकांनी टीका केल्यानंतर अमेरिकेचे उपराष्ट्राध्यक्ष जेडी व्हान्स यांनी इस्रायलला इशारा दिला होता. त्यावेळी व्हान्स म्हणाले होते की, “डोनाल्ड ट्रम्प हे सध्या इस्रायलप्रती सहानुभूती बाळगणारे जगातील एकमेव राष्ट्रप्रमुख आहेत. इस्रायलने आपल्या एकमेव शक्तिशाली मित्रराष्ट्रावर टीका करू नये.” तसेच इस्रायलच्या संरक्षणासाठी वापरली जाणारी बहुतांश शस्त्रास्त्रे अमेरिकेने पुरविल्याचेही त्यांनी नमूद केले होते.
हे ही वाचा:
जुलैच्या पहिल्याच आठवड्यात सरासरीपेक्षा ११ टक्के अधिक पाऊस
पंतप्रधान मोदी इंडोनेशिया, ऑस्ट्रेलिया, न्यूझीलंड दौऱ्यासाठी रवाना
धो-धो पावसाचा ‘वॉटर बोनस’! २४ तासांत मुंबईच्या पाणीसाठ्यात ३.७३% वाढ
E20 इंधनावरून भारत- भूतान आमनेसामने; भारताने फेटाळले दावे
इराण युद्धानंतर अमेरिका आणि इस्रायलमधील काही धोरणात्मक मतभेदांची चर्चा सुरू आहे. इराणसोबतच्या युद्धविराम कराराबाबत दोन्ही देशांच्या भूमिकांमध्ये फरक असल्याच्या बातम्या समोर आल्या होत्या. याच पार्श्वभूमीवर नेतान्याहू यांनी इस्रायलचे संबंध केवळ अमेरिकेपुरते मर्यादित नसून भारतासह अनेक देश इस्रायलचे विश्वासू भागीदार असल्याचे स्पष्ट केले. त्यांच्या या वक्तव्यामुळे भारत-इस्रायल संबंध पुन्हा एकदा आंतरराष्ट्रीय चर्चेच्या केंद्रस्थानी आले आहेत.