मध्यपूर्वेतील वाढत्या युद्धाच्या पार्श्वभूमीवर, इराणी सैन्याने पाकिस्तानकडे जाणाऱ्या एका कंटेनर जहाजाला होर्मुझची सामुद्रधुनी ओलांडण्यापासून रोखण्यात आल्याची माहिती समोर आली आहे. इस्लामिक रिव्होल्यूशनरी गार्ड कॉर्प्स (IRGC) नुसार, संयुक्त अरब अमिरातीच्या शारजा बंदरातून कराचीकडे निघालेल्या ‘सेलेन’ नावाच्या या जहाजाला, वाहतुकीच्या परवानगीअभावी परत फिरावे लागले आहे.
अमेरिका आणि इस्रायलसोबतच्या युद्धाच्या पार्श्वभूमीवर, इराणने पर्शियन आखाताला उर्वरित जगाशी जोडणारी होर्मुझची सामुद्रधुनी बंद केली आहे. मात्र, या सामुद्रधुनीतून इस्रायल, अमेरिका आणि या संघर्षाशी संबंधित इतरांची जहाजे सोडून काही देशांच्या जहाजांना सुरक्षित मार्ग मिळतो, असे इराणचे म्हणणे आहे. यात भारताचा देखील समावेश आहे. जागतिक तेल पुरवठ्यापैकी मोठा हिस्सा पुरवठा या सामुद्रधुनीतून होतो, परंतु जहाजांवरील हल्ल्यांमुळे जवळपास सर्वच टँकर वाहतूक थांबली आहे.
दरम्यान, “कायदेशीर नियमांचे पालन न केल्यामुळे आणि होर्मुझच्या सामुद्रधुनीतून जाण्याची परवानगी नसल्यामुळे आयआरजीसी नौदलाने ‘सेलेन’ या कंटेनर जहाजाला परत पाठवले,” असे आयआरजीसी नौदल कमांडर अलीरेझा तंगसिरी यांनी म्हटले आहे. “या जलमार्गातून कोणत्याही जहाजाच्या वाहतुकीसाठी इराणच्या सागरी प्राधिकरणाशी पूर्ण समन्वय आवश्यक आहे आणि इराणच्या ज्येष्ठ नेत्यांच्या पाठिंब्याची देखील गरज असल्याचे ते म्हणाले.
हे ही वाचा:
पाकिस्तान, नेपाळ आणि बांगलादेशमधून शस्त्र तस्करी करणारे १० तस्कर अटकेत
दिल्ली दंगलीतील आरोपी उमर खालिदला राज्यसभेवर पाठवा!
दिल्लीतील अकबर रोड, रायसीना रोड येथील कार्यालये रिकामी करण्यासाठी काँग्रेसला नोटीस
तिरंगाधारी सहा एलपीजी टँकर येतायत भारतात
तेहरानने म्हटले आहे की, ‘शत्रू नसलेली’ जहाजे इराणी अधिकाऱ्यांशी आगाऊ समन्वय साधून (आणि काही प्रकरणांमध्ये, त्यासाठी पैसे देऊन) आपल्या जहाजांसाठी मार्गाची व्यवस्था करू शकतात, परंतु शत्रूंशी संबंधित जहाजांना हा जलमार्ग ओलांडण्यास मनाई असेल.
मध्यपूर्वेत युद्ध पेटलेले असताना, पाकिस्तान हा संघर्ष संपवण्यासाठी अमेरिका आणि इराण यांच्यात “अर्थपूर्ण आणि निर्णायक चर्चा” घडवून आणणारा मध्यस्थ म्हणून स्वतःला सादर करण्याचा प्रयत्न करत आहे. चर्चेचे संभाव्य यजमान म्हणून इस्लामाबादची ही भूमिका, अमेरिकेचे अध्यक्ष डोनाल्ड ट्रम्प यांच्याशी जवळीक साधण्याच्या त्याच्या प्रयत्नांवर आणि शेजारील इराणच्या इस्लामिक प्रजासत्ताकाशी दीर्घकालीन संबंध असलेला एक तुलनेने तटस्थ देश म्हणून त्याच्या प्रतिमेवर आधारित आहे.
