लेबनॉनचे अर्थमंत्री अमेर बिसात यांनी इस्रायली हल्ल्यांमुळे देशाच्या अर्थव्यवस्थेला मोठा फटका बसल्याचे सांगितले. त्यांच्या मते, या संघर्षामुळे लेबनानला सुमारे २ अब्ज डॉलरचे आर्थिक नुकसान झाले आहे. बिसात यांनी सांगितले की, २ मार्चनंतर सुरू असलेल्या इस्रायली हल्ल्यांमुळे लेबनानला मोठ्या आर्थिक संकटाचा सामना करावा लागत आहे. ते म्हणाले, “या परिस्थितीचा परिणाम अत्यंत गंभीर आहे. लोकांच्या नोकऱ्या जात आहेत, शेती उत्पादन ठप्प होत आहे, बांधकाम कंपन्या बंद पडत आहेत आणि पर्यटक येणे थांबले आहे.”
बिसात यांनी पुढे सांगितले की, या हल्ल्यांमुळे झालेल्या नुकसानीचा अंदाज सुमारे २ अब्ज डॉलर इतका असून तो लेबनानच्या जीडीपीच्या जवळपास ७ टक्के आहे. बिसात यांच्या मते, सुरू असलेल्या संघर्षामुळे देशाची अर्थव्यवस्था, रोजगार, शेती, उद्योग आणि पर्यटन क्षेत्रावर गंभीर परिणाम झाला आहे. इस्रायलने मात्र दावा केला आहे की, हिझबुल्लाकडून होणाऱ्या हल्ल्यांना प्रत्युत्तर म्हणून ही लष्करी कारवाई सुरू ठेवण्यात आली आहे.
हे ही वाचा:
३० वर्षे जपानमध्ये…१८ वर्षे चालवलेले रेस्तराँ बंद करून यावं लागणार भारतात!
“बेकायदेशीर मध्यस्थता मान्य नाही” सिंधू जल करारावर भारत ठाम
“जग सध्या आपत्तींच्या दशकातून जातंय”
तृणमूल काँग्रेसच्या कार्यालयात सापडली बनावट आधार कार्डे
दरम्यान, रविवारी दक्षिण लेबनानमध्ये झालेल्या इस्रायली हल्ल्यात पती-पत्नीचा मृत्यू झाल्याची माहिती लेबनानच्या अधिकृत वृत्तसंस्था नॅशनल न्यूज एजन्सीने दिली. वृत्तानुसार, इस्रायली लढाऊ विमानांनी दक्षिण लेबनानमधील हबौश शहरातील अल-साहा परिसरावर हल्ला केला. या हल्ल्यात एक घर पूर्णपणे उद्ध्वस्त झाले असून मोहम्मद हसन जमूल आणि त्यांची पत्नी सकीना मोहम्मद अब्बास मक्की यांचा मृत्यू झाला. दुसरीकडे, इस्रायली सैन्याने (IDF) दावा केला की, उत्तर इस्रायलमधील मिसगाव आम परिसरात सायरन वाजल्यानंतर एक “संशयास्पद हवाई लक्ष्य” ओळखण्यात आले. हे विमान दक्षिण लेबनानमध्ये तैनात असलेल्या इस्रायली सैनिकांच्या जवळ कोसळल्याचे सांगण्यात आले असून या घटनेत कोणतीही जीवितहानी झालेली नाही.