इराण-अमेरिका तणावादरम्यान देशात LPG पुरवठा सुरळीत

इराण- अमेरिका संघर्षाच्या पार्श्वभूमीवरही देशातील LPG पुरवठा हळूहळू पूर्ववत होत असल्याचे दिसत आहे. सरकारी तेल कंपनी इंडियन ऑयल कॉर्पोरेशन (IOCL) ने सोमवारी (६ एप्रिल) सांगितले की, व्यावसायिक LPGचा पुरवठा आता संकटपूर्व पातळीच्या सुमारे ७० टक्क्यांपर्यंत पोहोचला आहे. कंपनीने स्पष्ट केले की, सध्याच्या परिस्थितीतही देशभरातील घरगुती आणि व्यावसायिक ग्राहकांना अखंड ऊर्जा पुरवठा सुनिश्चित करण्यासाठी प्रयत्न सुरू आहेत.

दरम्यान, पेट्रोलियम आणि नैसर्गिक वायू मंत्रालयाच्या माहितीनुसार, ऑनलाइन LPG बुकिंगमध्ये मोठी वाढ झाली असून ती आता ९५ टक्क्यांपर्यंत पोहोचली आहे. ४ एप्रिल रोजी देशभरात ५१ लाखांहून अधिक घरगुती गॅस सिलिंडरचे वितरण करण्यात आले, जे पुरवठा यंत्रणा वेगाने पूर्वपदावर येत असल्याचे संकेत आहे. सरकारने हे ही स्पष्ट केले की, देशातील कोणत्याही गॅस एजन्सीकडे साठा संपल्याची परिस्थिती नाही. पुरवठा अधिक पारदर्शक आणि सुव्यवस्थित ठेवण्यासाठी DAC (डिलिव्हरी ऑथेंटिकेशन कोड) आधारित वितरणाचा वापर ९० टक्क्यांपर्यंत वाढवण्यात आला आहे, जो फेब्रुवारीमध्ये ५३ टक्के होता.

ग्राहकांना सल्ला देण्यात आला आहे की, त्यांनी गॅस सिलिंडर बुकिंगसाठी डिजिटल माध्यमांचा वापर करावा आणि अनावश्यकपणे गॅस एजन्सींना भेट देणे टाळावे. या काळात लहान सिलिंडरची मागणीही वाढली आहे. पाच किलोच्या LPG सिलिंडरच्या विक्रीत वाढ झाली असून २३ मार्चनंतर आतापर्यंत सुमारे ६.६ लाख सिलिंडर विकले गेले आहेत. सरकारच्या मते, देशातील सर्व रिफायनऱ्या पूर्ण क्षमतेने कार्यरत असून कच्च्या तेलाचा पुरेसा साठा उपलब्ध आहे. पेट्रोल आणि डिझेलचा पुरवठाही पूर्णपणे स्थिर आहे.

हे ही वाचा:

भारत-रशिया ब्रह्मोस मागच्या ‘मास्टरमाइंड’चे निधन

अमेरिकन वैमानिकाच्या सुटकेसाठी ३६ तासांची मोहीम; इराणमधून कसे काढले बाहेर?

गॅस सिलेंडर चोरणाऱ्या टोळीचा पर्दाफाश; ४५ सिलेंडर आणि ३ दुचाकी जप्त

आपत्तीग्रस्त अफगाणिस्तानला भारताने दिला माणुसकीचा हात

अधिकाऱ्यांनी स्पष्ट केले की देशात कोणत्याही प्रकारची इंधन टंचाई नाही आणि नागरिकांनी घाबरून अनावश्यक बुकिंग किंवा साठेबाजी करू नये. IOCLनेही आश्वासन दिले की रुग्णालये, औषधनिर्मिती आणि शैक्षणिक संस्थांसारख्या महत्त्वाच्या क्षेत्रांना प्राधान्याने पुरवठा केला जात आहे. एकूणच, जागतिक संकटाच्या पार्श्वभूमीवरही भारताची ऊर्जा व्यवस्था स्थिर असून परिस्थिती हळूहळू सामान्य होत आहे.