पूर्व कांगोतील कोल्टन खाण कोसळली

पूर्व आफ्रिकेतील डेमोक्रॅटिक रिपब्लिक ऑफ कांगो (डीआर काँगो) या देशाच्या पूर्व भागात भीषण दुर्घटना घडली आहे. उत्तर किवू प्रांतातील रुबाया परिसरात असलेली कोल्टन खाण जोरदार पावसामुळे कोसळून दोनशेपेक्षा अधिक मजूरांचा मृत्यू झाल्याची माहिती स्थानिक बंडखोर अधिकाऱ्यांनी दिली आहे. या घटनेनंतर संपूर्ण परिसरात हळहळ व्यक्त केली जात असून अनेक कुटुंबांवर शोककळा पसरली आहे.

मिळालेल्या माहितीनुसार, ही दुर्घटना बुधवारी सकाळच्या सुमारास घडली. सलग अनेक दिवस सुरू असलेल्या मुसळधार पावसामुळे खाण परिसरातील माती सैल झाली होती. त्याचवेळी मोठ्या संख्येने मजूर खाणीत काम करत असताना अचानक भूस्खलन झाले आणि खाण कोसळली. काही क्षणांतच शेकडो मजूर माती-दगडांच्या ढिगाऱ्याखाली गाडले गेले.
हे ही वाचा:
‘GaN’ लष्करी तंत्रज्ञानात डीआरडीओचा ब्रेकथ्रू,

पुढील पाच वर्षे जागतिक बँकेकडून भारताला मिळणार ८-१० अब्ज डॉलर

आत्मनिर्भरतेकडे भारताचे पाऊल! देशात L410 NG विमानाची निर्मिती होणार?

अर्थसंकल्प विशेष: महागाईच्या मूल्यांकनाचा चेहरा मोहरा बदलणार
स्थानिक सूत्रांनी सांगितले की, मृतांचा आकडा अद्याप अंतिम नाही. अनेक मजूर अजूनही बेपत्ता असून, ते ढिगाऱ्याखाली अडकले असण्याची भीती व्यक्त केली जात आहे. त्यामुळे मृतांची संख्या पुढील काही तासांत किंवा दिवसांत वाढण्याची शक्यता आहे. जखमींना जवळच्या आरोग्य केंद्रांमध्ये दाखल करण्यात आले असले तरी, वैद्यकीय सुविधांचा अभाव ही मोठी अडचण ठरत आहे.

रुबाया परिसरातील ही कोल्टन खाण जागतिक स्तरावर अत्यंत महत्त्वाची मानली जाते. कोल्टन या खनिजापासून टँटॅलम धातू मिळतो, जो मोबाईल फोन, संगणक, इलेक्ट्रॉनिक उपकरणे आणि आधुनिक तंत्रज्ञानासाठी अत्यावश्यक असतो. या खाणीवर अनेक वर्षांपासून बंडखोर गटांचे नियंत्रण असल्याने येथे काम करणाऱ्या मजुरांना मूलभूत सुरक्षाही मिळत नाही, अशी टीका वारंवार होत आली आहे.

ही खाण AFC/M23 या बंडखोर गटाच्या नियंत्रणाखाली असल्याचे सांगितले जाते. संयुक्त राष्ट्रसंघाने यापूर्वीच या भागातील खाणकामाबाबत चिंता व्यक्त केली असून, खनिजांच्या अवैध उत्खननातून बंडखोर गटांना आर्थिक मदत मिळत असल्याचे आरोपही करण्यात आले आहेत. मात्र संबंधित गटांकडून हे आरोप फेटाळून लावण्यात आले आहेत.

दुर्घटनेनंतर बचावकार्य सुरू करण्यात आले असले तरी, सलग पाऊस, खराब रस्ते, अवघड भौगोलिक परिस्थिती आणि सुरक्षेचे प्रश्न यांमुळे मदतकार्याला मोठ्या अडचणी येत आहेत. स्थानिक नागरिक, स्वयंसेवी संस्था आणि काही मानवतावादी संघटना मदतीसाठी पुढे येत आहेत. तरीही, आवश्यक यंत्रसामग्री आणि साधनसामग्रीच्या अभावामुळे बचावकार्य मंदावले आहे.

या भीषण दुर्घटनेने पुन्हा एकदा पूर्व कांगोमधील असुरक्षित खाणकाम, मजुरांचे हालअपेष्टा आणि मानवी जीवांच्या किमतीकडे दुर्लक्ष होण्याची गंभीर समस्या समोर आणली आहे. सरकार आणि आंतरराष्ट्रीय समुदायाने याकडे गांभीर्याने लक्ष देण्याची गरज व्यक्त केली जात आहे.