रशियाचे राजधानीचे शहर मॉस्कोमध्ये शुक्रवार, २२ मार्च रोजी दहशतवादी हल्ला झाला होता. यात १३९ जणांचा मृत्यू झाला होता तर दीडशे हून अधिक जण जखमी झाले होते. रशियाचे अध्यक्ष व्लादिमीर पुतिन यांनी सोमवार, २५ मार्च रोजी सांगितले की, मॉस्कोमधील क्रोकस सिटी हॉलमध्ये झालेला दहशतवादी हल्ला हा इस्लामिक अतिरेक्यांनी केला होता, परंतु १३९ लोकांचा बळी घेणाऱ्या या नरसंहारात युक्रेनची भूमिका होती, असा ठाम दावाही पुतीन यांनी केला आहे.
शतकांपासून मुस्लिम जगाची विचारधारा असलेल्या कट्टरपंथी इस्लामवाद्यांनी केलेल्या हल्ल्याचा आदेश कोणी दिला हे अद्याप तपास यंत्रणांच्या हाती लागलेले नाही. रशियामधील दोन दशकांतील सर्वात प्राणघातक हल्ल्याला प्रत्युत्तर म्हणून केलेल्या उपाययोजनांच्या उद्देशाने क्रेमलिनच्या बैठकीत पुतिन यांनी हे मत मांडले. याचा फायदा कोणाला होतो हा प्रश्न पडतो? हा अत्याचार निओ-नाझी कीव राजवटीच्या हातून २०२४ पासून रशियाशी युद्ध करणाऱ्यांनी केलेल्या प्रयत्नांच्या संपूर्ण मालिकेतील एक दुवा असू शकतो, असे मत पुतीन यांनी मांडले आहे. या हल्ल्याचा उद्देश हाच होता की, लोकांमध्ये भीतीचे वातावरण निर्माण करणे.
तत्पूर्वी, पुतिन म्हणाले की, “मॉस्को कॉन्सर्ट हॉलमधील हल्लेखोरांनी युक्रेनला पळून जाण्याचा प्रयत्न करण्यासाठी मॉस्कोच्या नैऋत्येस सुमारे ३४० किमी अंतरावर असलेल्या ब्रायन्स्क प्रदेशात प्रवेश केला होता. तसेच युक्रेनच्या बाजूने काही लोकांनी चार हल्लेखोरांना रशियामधून सीमा ओलांडून देण्याची तयारी केली होती.” दुसरीकडे युक्रेनने रशियन अध्यक्षांचे सर्व आरोप फेटाळून लावले आहेत.
इस्लामिक स्टेटने या हल्ल्याची जबाबदारी स्वीकारली आहे. क्रोकस सिटी हॉल- कॉन्सर्टचे ठिकाण आणि शॉपिंग सेंटर येथे नागरिकांवर गोळीबार करणारे चार हल्लेखोरांचे बॉडीकॅम फुटेज जारी केले आहे. इस्लामिक स्टेट खोरासान ( ISIS-K) – मध्य आशियातील काही भागांमध्ये आणि प्रामुख्याने अफगाणिस्तानमध्ये सक्रिय असलेल्या दहशतवादी संघटनेशी संलग्न असलेल्या गटाने या हल्ल्यामागे त्यांचा हात असल्याचा दावा केला आहे.
दरम्यान, अमेरिकन अधिकाऱ्यांनी सांगितले की, त्यांनी रशियाला या महिन्याच्या सुरूवातीस एका हल्ल्याचा इशारा दिला होता, हा संदेश मॉस्कोने दुर्लक्षित केल्याचे दिसून येत आहे. फ्रान्सनेही या हल्ल्यामागे इस्लामिक स्टेटचा हात असल्याचे म्हणत अमेरिकेला साथ दिली आहे. फ्रान्सचे अध्यक्ष इमॅन्युएल मॅक्रॉन यांनी सोमवारी पत्रकारांना सांगितले की, “उपलब्ध माहितीवरून असे दिसून आले आहे की खरोखरच इस्लामिक स्टेटच्या एका घटकाने हा हल्ला केला होता. दरम्यान, युक्रेनचा या हल्ल्याशी काही संबंध असल्याचे समर्थन करणारे कोणतेही पुरावे नाहीत, असे विधान अमेरिकेने केले आहे. व्हाईट हाऊसच्या प्रेस सेक्रेटरी कॅरिन जीन-पियरे म्हणाले की, दहशतवादी हल्ला हा इस्लामिक स्टेटने केला होता. पुतिन यांना ते समजते आणि चांगलेचं ठाऊक होते.
हे ही वाचा:
सुप्रिया श्रीनेटच्या आक्षेपार्ह पोस्टवर कंगना राणौतचा पलटवार!
ओम बिर्ला यांना टक्कर देण्यासाठी प्रल्हाद गुंजाळ मैदानात!
बंगळूरूमध्ये पाण्याचा अपव्यय करणाऱ्या २२ नागरिकांना लाखोंचा दंड
काँग्रेसच्या सहाव्या यादीतून पाच उमेदवार जाहीर
मॉस्को कॉन्सर्ट हॉल हल्ल्याप्रकरणी तब्बल ११ जणांना ताब्यात घेण्यात आले असून त्यापैकी चार जणांवर आरोप ठेवण्यात आले आहेत. चार संशयितांपैकी तिघांनी रविवारी न्यायालयात हजर राहिल्यानंतर गुन्हा कबूल केला. हे चारही जण ताजिकिस्तानचे नागरिक आहेत. त्यांना २२ मे पर्यंत कोठडीत ठेवण्यात आले आहे.
