नॅशनल पेमेंट्स कॉर्पोरेशन ऑफ इंडिया (एनपीसीआय) ने नवीन महिन्याच्या सुरुवातीसच शनिवारी युनिफाइड पेमेंट्स इंटरफेस (यूपीआय) व्यवहारांचे ताजे आकडे जाहीर केले आहेत. ताज्या आकडेवारीनुसार, गेलेल्या ऑक्टोबर महिन्यात यूपीआय व्यवहारांच्या संख्येत तब्बल २५ टक्क्यांची वाढ झाली आहे. फेस्टिव्ह सीझन आणि जीएसटी २.० सुधारणा यांच्या पार्श्वभूमीवर ही वाढ नोंदवली गेली आहे.
एनपीसीआयने दिलेल्या माहितीनुसार, ऑक्टोबर महिन्यात यूपीआय व्यवहारांची संख्या वार्षिक आधारावर २५ टक्क्यांनी वाढून २०.७० अब्ज इतकी झाली आहे. त्याचबरोबर, व्यवहारांच्या रकमेचाही वार्षिक आधारावर १६ टक्क्यांनी वाढ होऊन ती २७.२८ लाख कोटी रुपयांवर पोहोचली आहे. दररोजच्या सरासरी व्यवहारांची संख्या ६६८ दशलक्ष (मिलियन) आणि दररोजच्या सरासरी व्यवहाराची रक्कम ८७,९९३ कोटी रुपये इतकी नोंदवली गेली आहे.
हेही वाचा..
आंध्र प्रदेशातील वेंकटेश्वर स्वामी मंदिरात चेंगराचेंगरी; नऊ भाविकांचा मृत्यू
दहशतवादावर राष्ट्रीय सुरक्षा सल्लागार अजित डोवाल काय म्हणाले?
‘दिल्लीचे नाव इंद्रप्रस्थ करा’
‘माझ्या कुटुंबासाठी नाही, सर्वांसाठी काम केले’
त्याआधीच्या महिन्याचे म्हणजेच सप्टेंबरचे आकडे पाहिले तर, सप्टेंबरमध्ये यूपीआय व्यवहारांची संख्या वार्षिक आधारावर ३१ टक्क्यांनी वाढून १९.६३ अब्ज झाली होती. तर व्यवहारांच्या रकमेने वार्षिक आधारावर २१ टक्क्यांची उल्लेखनीय वाढ नोंदवून २४.९० लाख कोटी रुपयांचा आकडा गाठला होता. सप्टेंबर महिन्यात दररोजच्या सरासरी व्यवहारांची संख्या ६५४ दशलक्ष आणि सरासरी व्यवहाराची रक्कम ८२,९९१ कोटी रुपये इतकी होती. याशिवाय, एनपीसीआयने प्रसिद्ध केलेल्या इमीडिएट पेमेंट सर्व्हिस (आयएमपीएस) च्या आकडेवारीनुसार, व्यवहारांची संख्या सप्टेंबरमधील ३९४ दशलक्ष वरून ऑक्टोबरमध्ये वाढून ४०४ दशलक्ष झाली आहे. व्यवहारांच्या रकमेच्याही बाबतीत वाढ झाली असून ती सप्टेंबरमधील ५.९७ लाख कोटी रुपयांवरून ऑक्टोबरमध्ये ६.४२ लाख कोटी रुपयांवर पोहोचली आहे.
दरम्यान, बँक ऑफ बडोदाच्या ताज्या अहवालानुसार, गेल्या महिन्यात फेस्टिव्ह सीझनमध्ये यूपीआयद्वारे झालेला खर्च वाढून १७.८ लाख कोटी रुपयांपर्यंत पोहोचला आहे, जो की मागील वर्षीच्या १५.१ लाख कोटी रुपयांच्या तुलनेत १७ टक्क्यांहून अधिक वाढ दर्शवतो. यूपीआयद्वारे खर्चाचा हा आकडा दशहर्यापासून ते दिवाळीपर्यंतच्या कालावधीसाठी जाहीर करण्यात आला होता.
