पंजाबमध्ये स्वाईन फ्लूमुळे एका संशयिताचा मृत्यू

पंजाबमध्ये स्वाईन फ्लूचा धोका वाढताना दिसत असून यावर्षी एच१एन१च्या रुग्णांची संख्या २२० वर पोहोचली आहे. त्यातच जालंधरमध्ये ८५ वर्षीय मूलराज यांचा उपचारादरम्यान मृत्यू झाल्याने राज्यात स्वाईन फ्लूमुळे झालेल्या पहिल्या संशयित मृत्यूची नोंद झाली आहे. मूलराज यांना श्वास घेण्यास त्रास होत असल्याने रुग्णालयात दाखल करण्यात आले होते. त्यांना आधीपासून सीओपीडीचा त्रास होता. २ सप्टेंबर रोजी अमृतसरच्या शासकीय वैद्यकीय महाविद्यालयात त्यांची एच१एन१ चाचणी पॉझिटिव्ह आली होती आणि त्यानंतर जालंधरच्या सिव्हिल हॉस्पिटलमध्ये उपचार सुरू असताना शुक्रवारी त्यांचा मृत्यू झाला. मात्र, त्यांचा मृत्यू थेट एच१एन१ संसर्गामुळेच झाला, असे आरोग्य विभागाने अद्याप स्पष्ट केलेले नाही. वय अधिक असणे, प्रतिकारशक्ती कमी असणे आणि अनेक आजार असणे यामुळे मृत्यूचे नेमके कारण निश्चित करण्यासाठी आरोग्य ऑडिट केले जाणार आहे.
हे ही वाचा:
इंडोनेशियात अनाक क्राकाटोआ ज्वालामुखीच्या उद्रेकामुळे राखेचे प्रचंड ढग

मुंबईत दहीहंडी उत्सवादरम्यान ३७६ गोविंदा जखमी

पंजाबमध्ये जानेवारीपासून आतापर्यंत १,५१३ संशयित स्वाईन फ्लू रुग्णांची तपासणी करण्यात आली असून त्यापैकी २२० जणांची एच१एन१ चाचणी पॉझिटिव्ह आली आहे. शुक्रवारीच १४ नवीन रुग्णांची भर पडली. लुधियाण्यात सर्वाधिक ७२ रुग्ण आढळले असून मोहालीमध्ये ३६, पटियालामध्ये १६, मोगामध्ये ११ आणि जालंधरमध्ये १० रुग्णांची नोंद झाली आहे. ऑगस्टपासून रुग्णसंख्येत वाढ होत असल्याने आरोग्य विभागाने तपासणी आणि देखरेख वाढवली आहे. विविध रुग्णालयांमध्ये फ्लू कॉर्नर आणि विलगीकरण कक्ष सुरू करण्यात आले आहेत, तर संशयित रुग्णांची वेळीच तपासणी करून उपचार देण्यावर भर दिला जात आहे.

दरम्यान, पंजाबचे आरोग्यमंत्री डॉ. बलबीर सिंह यांनी नागरिकांनी घाबरून न जाता सतर्क राहण्याचे आवाहन केले आहे. पंजाबमध्ये आढळलेला एच१एन१ विषाणू नवीन किंवा म्युटेट झालेला असल्याचे कोणतेही पुरावे नसल्याचे त्यांनी स्पष्ट केले. मात्र, फ्लूसारखी लक्षणे जाणवणाऱ्या नागरिकांनी त्याकडे दुर्लक्ष न करता तातडीने वैद्यकीय सल्ला घ्यावा, असे आरोग्य विभागाने सांगितले आहे. त्यामुळे वाढती रुग्णसंख्या आणि पहिल्या संशयित मृत्यूच्या पार्श्वभूमीवर पंजाबच्या आरोग्य यंत्रणेने परिस्थितीवर बारकाईने लक्ष ठेवण्यास सुरुवात केली आहे.