ट्रम्प यांचा ‘एपिक फ्युरी २.०’चा इशारा

अमेरिकेचे अध्यक्ष डोनाल्ड ट्रम्प यांनी इशारा दिला की, इराणविरुद्धच्या युद्धाला आठ महिने पूर्ण होत आले असताना आणि वाढत्या इंधन किमतींचा अमेरिकेच्या मध्यावधी निवडणुकांवर परिणाम होत असताना, वॉशिंग्टन इराणविरुद्ध आणखी एक लष्करी कारवाई सुरू करू शकते. वॉशिंग्टन आणि तेल अवीवने आपली लष्करी मोहीम पुन्हा सुरू केल्यास, तेहरान आखातातील समुद्राखालील दळणवळण केबल्सना लक्ष्य करण्याची तयारी करत असल्याच्या वृत्तांनंतर काही तासांतच हा इशारा देण्यात आला.

“आम्ही आणखी एक छोटी ‘एपिक फ्युरी’ मोहीम राबवू शकतो,” असे ट्रम्प शुक्रवारी फ्लोरिडातील सभेत म्हणाले. २८ फेब्रुवारी रोजी सुरू झालेल्या इराणविरोधातील अमेरिकी लष्करी मोहिमेचा उल्लेख त्यांनी यावेळी केला. दरम्यान, अमेरिकेने पुन्हा हल्ला केल्यास आखातातील समुद्राखालील इंटरनेट केबल्सना लक्ष्य करण्याची तयारी इराणने केली आहे.

ट्रम्प यांनी इराणसोबत करार करण्याची शक्यता व्यक्त केली. मात्र, तेहरान चर्चेसाठी पुढाकार घेईल का, याबाबत त्यांनी शंका उपस्थित केली. अमेरिकेला हे युद्ध लवकर संपवता येऊ शकते; मात्र संघर्ष तातडीने संपवायचा की हळूहळू कमी होऊ द्यायचा, हा प्रश्न असल्याचेही त्यांनी म्हटले. वाढत्या इंधन किमती आणि आगामी अमेरिकी मध्यावधी निवडणुकांच्या पार्श्वभूमीवर युद्धाच्या आर्थिक परिणामांची चिंता वाढली आहे.

इराणवर नव्याने हल्ला झाल्यास संघर्ष संपूर्ण पश्चिम आशियात पसरण्याची शक्यता तुर्कीचे परराष्ट्रमंत्री हाकान फिदान यांनी व्यक्त केली. मुत्सद्देगिरी आणि संवादातूनच युद्ध संपवता येईल, असे त्यांनी स्पष्ट केले. फ्रान्सचे परराष्ट्रमंत्री जीन-नोएल बॅरोट यांनीही नव्या संघर्षामुळे तेलाच्या किमती वाढण्याचा इशारा दिला.

हे ही वाचा:

पंतप्रधान मोदी, कॅप्टन स्मित यांना इस्रायलच्या स्वातंत्र्यदिनी मशाल प्रज्वलनाचे निमंत्रण

महापौर, अमिताभ, दिलजित दोसांजसह शाळांना बॉम्बची धमकी

म्यानमारमधील शस्त्र प्रशिक्षण प्रकरणी मॅथ्यू व्हॅनडाइक भारतात परतला

तिघांच्या हत्येप्रकरणी दहशतवाद्याला दुहेरी जन्मठेप

अमेरिका आणि इस्रायलने पुन्हा हल्ला केल्यास होर्मुझच्या सामुद्रधुनीतील सात प्रमुख इंटरनेट केबल्सना लक्ष्य करण्याची योजना इराणने आखल्याचे वृत्त आहे. जगातील सुमारे ९९ टक्के इंटरनेट वाहतूक समुद्राखालील केबल्समधून होते. अनेक केबल्स बाधित झाल्यास इंटरनेट सेवा, आर्थिक व्यवहार, ई-कॉमर्स आणि क्लाउड सेवांमध्ये अडथळे निर्माण होऊ शकतात.