मध्यपूर्वेतील तणाव आणखी तीव्र झाला असून अमेरिकेने गुरुवारी (१६ जुलै) सलग पाचव्या रात्री इराणवर नव्या हवाई हल्ल्यांची मालिका सुरू केली आहे. अमेरिकेच्या सेंट्रल कमांडने (CENTCOM) ही कारवाई इराणची लष्करी क्षमता आणखी कमकुवत करण्यासाठी असल्याचे स्पष्ट केले आहे. दुसरीकडे, संघर्ष सुरू असतानाही इराण अमेरिकेसोबत चर्चा करण्यास इच्छुक असल्याचा दावा व्हाईट हाऊसने केला आहे.
CENTCOM च्या माहितीनुसार, गुरुवारी दुपारी (अमेरिकन वेळेनुसार) नव्या हवाई मोहिमेला सुरुवात करण्यात आली. या कारवाईत इराणची लष्करी क्षमता, संरक्षण व्यवस्था आणि सामरिक संसाधने लक्ष्य करण्यात आली. अमेरिकेने जारी केलेल्या निवेदनात म्हटले आहे की, “इराणची लष्करी क्षमता आणखी खिळखिळी करण्यासाठी नव्या हल्ल्यांची मोहीम सुरू करण्यात आली आहे.”
अमेरिकेच्या घोषणेनंतर काही वेळातच इराणच्या सरकारी दूरदर्शनने दक्षिणेकडील बंदर अब्बास परिसरात अमेरिकन क्षेपणास्त्रांचे हल्ले झाल्याचे वृत्त दिले. बंदर अब्बास हे होर्मुझ सामुद्रधुनीलगतचे अत्यंत महत्त्वाचे बंदर मानले जाते. जागतिक तेलवाहतुकीचा मोठा हिस्सा या सामुद्रधुनीतून जात असल्याने या भागातील कोणतीही लष्करी कारवाई जागतिक ऊर्जा बाजारासाठीही महत्त्वाची ठरते. इराणने या हल्ल्यांमधील जीवित किंवा वित्तहानीबाबत तत्काळ कोणतीही अधिकृत माहिती दिलेली नाही.
सततच्या हवाई हल्ल्यांदरम्यानही अमेरिका आणि इराण यांच्यातील राजनैतिक संवाद पूर्णपणे बंद झालेला नसल्याचे व्हाईट हाऊसने सांगितले आहे. व्हाईट हाऊसच्या प्रेस सचिव कॅरोलिन लेव्हिट यांनी पत्रकार परिषदेत सांगितले की, इराण अजूनही अमेरिकेशी संपर्कात आहे आणि करार करण्याची इच्छा व्यक्त करत आहे. त्यांच्या म्हणण्यानुसार, “अमेरिकन लष्कराच्या कारवाईमुळे इराणला मोठे नुकसान सहन करावे लागत असून त्यामुळे ते चर्चेच्या माध्यमातून तोडगा काढण्यास इच्छुक आहेत.”
संरक्षण क्षेत्रातील अधिकाऱ्यांच्या माहितीनुसार, सध्याचे हवाई हल्ले केवळ तत्काळ प्रत्युत्तर देण्यासाठी नसून भविष्यात आवश्यक ठरल्यास अधिक मोठ्या लष्करी कारवायांसाठी इराणची हवाई संरक्षण यंत्रणा, क्षेपणास्त्र तळ, ड्रोन क्षमता आणि किनारी संरक्षण व्यवस्था कमकुवत करण्याच्या व्यापक रणनीतीचा भाग आहेत.
हे ही वाचा:
‘आम्हाला काहीच फुकट मिळालेलं नाही’!
१५०० रुपयांची उधारी आणि कौटुंबिक वाद; मित्रानेच काढला मित्राचा काटा
कॅप्टन हरमनप्रीतवर उठणारे प्रश्न बंद करा!
LPG सिलिंडर हवाय? करा स्वीगी; ४५ मिनिटांत घरपोच सेवा
गेल्या काही दिवसांपासून अमेरिका आणि इराण यांच्यात क्षेपणास्त्र, ड्रोन आणि हवाई हल्ल्यांची मालिका सुरू आहे. इराणकडून अमेरिकन तळांवरही हल्ल्यांचे प्रयत्न झाल्याची माहिती समोर आली आहे. या संघर्षामुळे मध्यपूर्वेतील तणाव वाढला असून होर्मुझ सामुद्रधुनीतील सुरक्षेबाबत आणि जागतिक तेलपुरवठ्याबाबतही चिंता वाढली आहे.