पंजाबला २०२९ मध्ये ‘चिट्टा’पासून मुक्त करण्याचे अमित शहांचे वचन

केंद्रीय गृहमंत्री अमित शाह यांनी बुधवारी (३० सप्टेंबर) आगामी पंजाब विधानसभा निवडणुकीच्या पार्श्वभूमीवर अंमली पदार्थांचे उच्चाटन हा भाजपच्या प्रचाराचा प्रमुख मुद्दा बनवला. मतदारांनी भाजपला पाठिंबा दिल्यास, ३१ डिसेंबर २०२९ पूर्वी पंजाबला ‘चिट्टा’च्या अंमली पदार्थांच्या व्यापारातून मुक्त करू, असे आश्वासन त्यांनी दिले.

जालंधर येथे आयोजित करण्यात आलेल्या एका जाहीर सभेला संबोधित करताना अमित शाह यांनी अंमली पदार्थांच्या मुद्द्यावरून आम आदमी पक्षाच्या सरकारवर निशाणा साधला. पंजाबमध्ये ‘चिट्टा’चा व्यापार खुलेआम सुरू राहण्यास परवानगी देण्यात आली असल्याचा आरोप त्यांनी केला.

अमित शाह म्हणाले, “मला पंजाबच्या जनतेला सांगायचे आहे की, तुम्ही भाजपला एक संधी दिली, तर ३१ डिसेंबर २०२९ पूर्वी आम्ही पंजाबला ‘चिट्टा’पासून मुक्त करू.” त्यांनी पंजाबमधील अंमली पदार्थांच्या समस्येचा मुद्दा उपस्थित करताना राज्य सरकारच्या कारभारावरही प्रश्नचिन्ह उपस्थित केले. पंजाबमध्ये अंमली पदार्थांचा वाढता व्यापार आणि त्याचा तरुणांवर होणारा परिणाम हा निवडणूक प्रचारातील महत्त्वाचा मुद्दा ठरण्याची शक्यता आहे.

हे ही वाचा:

लवलीनाचा ठोसा, सुवर्णाची आशा

टोकियोत सोन्याचा नेम, पॅरिसमध्ये चांदीचा गेम!

नेम धरला, सोने जिंकले; नीरू-किनानने भारताचा डंका वाजवला!

पहलगाम हल्ल्यातील चारही दहशतवाद्याना जन्नत

अमित शाह यांनी आपल्या भाषणातून अंमली पदार्थांविरोधातील कारवाईला भाजपच्या पंजाबमधील राजकीय अजेंड्याच्या केंद्रस्थानी ठेवले. त्यांनी आम आदमी पक्षाच्या सरकारवर ‘चिट्टा’च्या व्यापाराला आळा घालण्यात अपयशी ठरल्याचा आरोप केला. पंजाबमध्ये ‘चिट्टा’ हा शब्द प्रामुख्याने हेरॉईन किंवा हेरॉईनसदृश अंमली पदार्थांसाठी वापरला जातो. राज्यातील अंमली पदार्थांची समस्या गेल्या काही वर्षांपासून राजकीय आणि सामाजिक चर्चेचा प्रमुख विषय राहिली आहे.

शाह यांच्या या घोषणेमुळे आगामी पंजाब विधानसभा निवडणुकीत अंमली पदार्थांचा मुद्दा भाजपच्या प्रचारातील प्रमुख मुद्दा बनण्याचे संकेत मिळत आहेत.