रेवंत रेड्डी, तुम्ही तेलंगणाला काँग्रेस नेत्यांचे एटीएम बनवले!

केंद्रीय गृहमंत्री अमित शहा यांनी सोमवारी हैदराबाद येथील सभेत तेलंगणाचे मुख्यमंत्री रेवंत रेड्डी आणि काँग्रेसवर जोरदार टीका केली. “रेवंत रेड्डीजी, तुम्ही संपूर्ण तेलंगणाला दिल्लीत बसलेल्या काँग्रेस नेत्यांसाठी एटीएम बनवले आहे. तेलंगणातील जनता तुम्हाला कधीही माफ करणार नाही,” असे शहा म्हणाले.

भारतीय जनता पक्षाने हैदराबादमध्ये आयोजित केलेल्या ‘लोकशाही वाचवा, अराजकता हटवा’ या पदयात्रेनंतर झालेल्या सभेला संबोधित करताना अमित शहा यांनी तेलंगणातील काँग्रेस सरकारवर भ्रष्टाचार आणि आश्वासने पूर्ण न केल्याचा आरोप केला. राहुल गांधी यांनी तेलंगणातील जनतेला सहा हमी दिल्या होत्या; मात्र त्यापैकी एकही हमी पूर्ण करण्यात आलेली नाही, असा दावा त्यांनी केला.

शहा म्हणाले, “रेवंत रेड्डीजी, तुम्ही संपूर्ण तेलंगणाला दिल्लीत बसलेल्या काँग्रेस नेत्यांसाठी एटीएम बनवले आहे. तेलंगणातील जनता तुम्हाला कधीही माफ करणार नाही. राहुलजींनी सहा हमी दिल्या होत्या. मात्र, त्यापैकी एकही हमी पूर्ण झालेली नाही.”

हे ही वाचा:

बँक घोटाळ्याप्रकरणी ईडीने केली ५४ कोटी रुपयांची मालमत्ता जप्त

२०२९ ला मोदींसाठी राहुल गांधी यांचे रेड कार्पेट…

सत्ताबदल लोकशाही मार्गानेच हवा!

सेंथिलकुमारची चेक ओपनच्या अंतिम फेरीत धडक

तेलंगणातील विकासासाठी असलेला निधी दिल्लीतील काँग्रेस नेतृत्वाकडे वळवला जात असल्याचा आरोपही अमित शहा यांनी केला. राज्यातील भ्रष्टाचार आणि कथित गैरव्यवहारांवरून त्यांनी काँग्रेस सरकारला लक्ष्य केले. तेलंगणातील भ्रष्टाचार आणि राज्य विकण्याच्या कथित कटाला काँग्रेस, बीआरएस किंवा असदुद्दीन ओवेसी यांचा पक्ष रोखू शकणार नाही. पंतप्रधान नरेंद्र मोदी यांच्या नेतृत्वाखाली केवळ भाजपच हे करू शकतो, असा दावा त्यांनी केला.

मग रेवंत रेड्डी मुख्यमंत्री कसे झाले?

काँग्रेस आणि राहुल गांधी यांनी इलेक्ट्रॉनिक मतदान यंत्रांवर (ईव्हीएम) केलेल्या आक्षेपांनाही शहा यांनी प्रत्युत्तर दिले. ते म्हणाले, “राहुलजी, ईव्हीएममध्ये दोष असतील, तर तुमचे रेवंत रेड्डी तेलंगणाचे मुख्यमंत्री कसे झाले? केरळ, तामिळनाडू आणि हिमाचल प्रदेशमध्ये तुमचे सरकार कसे स्थापन झाले? ईव्हीएम इतकी खराब असतील, तर तुम्ही सत्तेची शपथच घ्यायला नको होती. तुम्ही निवडून येता तेव्हा विजयाचे श्रेय जनतेला देता आणि पराभव झाला की ईव्हीएमला दोष देता.”

काँग्रेसच्या नेतृत्वाखालील विरोधकांनी दिल्लीतील रामलीला मैदानावर आयोजित केलेल्या सभेवरही त्यांनी टीका केली. ही सभा ‘मतदान वाचवा’ यासाठी नव्हती, तर कथित घुसखोरांना वाचवण्यासाठी होती, असा आरोप त्यांनी केला. विशेष सखोल मतदारयादी पुनरीक्षण (एसआयआर) प्रक्रियेला काँग्रेस विरोध करत असल्याचा मुद्दाही त्यांनी उपस्थित केला.

काँग्रेसच्या दहा वर्षांच्या सत्ताकाळात सुमारे १२ लाख कोटी रुपयांचे घोटाळे आणि भ्रष्टाचार झाल्याचा आरोप अमित शहा यांनी केला. देश पुन्हा काँग्रेसच्या हातात सोपवता येणार नाही, असे ते म्हणाले.